Apasoro 15:16-28

¹⁶‘Dividivi mame onanapewa, ne sira taig Devid tabenako meuma gomag aignewa sitna. Undag gongamak aignewa sira sitna numanwa mina ape.

¹⁷Me, iyayapan upeba, mu Ju onan igiyawa, mu ne ivunwa gumbe iyayapan vemewa sira mu undag Ayapan kinuni atan oya.

¹⁸Ayapan me watavit ampa wag dirumnewa, me meib waivi.’

¹⁹Meoya, oieba, ne ano neuma gumbe keptena. Ju onan igiyawa mu God gumbe nib danowa tobiroriyayawa den anopipanum amuniya.

²⁰Megara, nu gigirum munan mamaib teg dirumta. Ugauga goddeba namive tene miyotawa, uinantaraki, mae meyawa inoniyayawa ge ganigani mu yankwetanit di.

²¹Kuiyawa watavit ampa gwetoimu desirom desirom danave Mosisi Gwangwaneba opata vemewa wakeya, sira Sabat Kumiwa apa evedni sinagogu danave mu basiyag omome.”

²²Meve apasoro, namuyoiyoi igiyawa ge siosi undag ung wayawa, siosi igiyawa mu yapowo apan upeba gomiya mumpe sira mu tepe Poru ge Banabas gaibu Antiok ampe. Mu Judas, (me iviwa veme Barusabas), ge Sairas gomiya muniya. Mu tatawaiwa yapowo namuyoiyoi igiyawa.

²³Mu gaibu gigirum baraueme aivi. Mu mamib teya. “Tateaiwa, apasoro ge namuyoiyoi igiyawa mu Antiok, Siria ge Sirisiya danave Ju onan tatawaiwa oya kaiwa kaiwa muma veme.

²⁴Nu amutan den watu, go nu yapunup iyayapan upeba mu gae waya gumbe ye anopipanum ayana sira ye nonemagewa yaimoyai den wakene. Nu meib anoete.

²⁵Nu danunwa undag desirom ane. Nu apan upeba gomiya muntu sira nu iyayapan numa nonunmagawa Poru ge Banabas gaibu yenan te muntu.

²⁶Poru ge Banabas mame mu Ayapan numa Iesu Keriso iviwa oya inaiinai muma topayaya.

²⁷Meoya nu Judas ge Sairas temete mu gae desiroma mu nouwa gumbe wape.

²⁸Guwawa Iyakaisiyapama ge nu dividivi mame amaratan anoetewa me mekut yempe. Ibnawa da den yempe.