Apasoro 15:11-21

¹¹Nu anotumat atu Ayapan numa Iesu ano oraiwa gumbe waitawaita autu. Sira mu mina meib.”

¹²Meve iyayapan undag agoniyayawa nouwa iyagisia. Banabas ge Poru mu God Ju onan igiyawa yapowo mu gumbo irakoniwa ge anopipanumawa anewa gae waya. Gae vemewa, mu yaimoyai anoya.

¹³Mu gae waya onanane meve Jemus garawa wane, “Tatangwanen, ne gunap anoigimiya.

¹⁴God aninin namu Ju onan igiyawa gumbo kwayub a munne, sira me iviwa gumbe waya igiyawa mu yapowo iyayapan meuma bone, Simeon nu gunup wait gae wasiwamne.

¹⁵Propeta gae mumawa gae mame desirom ane. Me meib di tene.

¹⁶‘Dividivi mame onanapewa, ne sira taig Devid tabenako meuma gomag aignewa sitna. Undag gongamak aignewa sira sitna numanwa mina ape.

¹⁷Me, iyayapan upeba, mu Ju onan igiyawa, mu ne ivunwa gumbe iyayapan vemewa sira mu undag Ayapan kinuni atan oya.

¹⁸Ayapan me watavit ampa wag dirumnewa, me meib waivi.’

¹⁹Meoya, oieba, ne ano neuma gumbe keptena. Ju onan igiyawa mu God gumbe nib danowa tobiroriyayawa den anopipanum amuniya.

²⁰Megara, nu gigirum munan mamaib teg dirumta. Ugauga goddeba namive tene miyotawa, uinantaraki, mae meyawa inoniyayawa ge ganigani mu yankwetanit di.

²¹Kuiyawa watavit ampa gwetoimu desirom desirom danave Mosisi Gwangwaneba opata vemewa wakeya, sira Sabat Kumiwa apa evedni sinagogu danave mu basiyag omome.”