Text copied!
CopyCompare
GAE MATAIWA - Apasoro - Apasoro 13

Apasoro 13:16-50

Help us?
Click on verse(s) to share them!
16Meve Poru wan yoik naniwa viyak wane, “Isuraeru igiyawa ge God gumbe aepam emewa, ne watna anoya.
17Isuraeru igiyawa God mumawa. Me mamanaiwa wagomiyamunne. Iyayapan Ejipt danave wakeyawa me yusiwa munne obiren aya. Naniwa painau enagakke iyayapan namuwo yoik tam at me kweg dauwag onamiya.
18At Inguiwa arawa danave bairawan 40 mina mu amat amunne.
19At Keinan danave dam 7 me wakukamunne. Piyu me keb ag munne piyu kwan muma ane.
20Undag mame bairawan 450 mina aune. Dividivi mame onanane me keptete igiyawa munne, meve propeta Samueru baraune onne.
21Meve iyayapan kin oya autan anoeme. Meoya God dam Benjamin apan Kis usiwa Sauru munne. Me bairawan 40 amarane.
22God Sauru itarane, meve Devid aug yudabne kin muma ane. Me Devid yaug natawa wane, ‘Ne Jesi usiwa Devid yauna. Me nonenwa, sira dividivi undag ne anoeniwa me ape.’
23Apan mame yawa meuma gumbe, God me Waita Abnawa Iesu baraune. Me Isuraeru uwanewa agi wanewa gumbe.
24Namu Jon nonemagowa biroriyatan ge babataito atan oya Isuraeru igiyawa undag gumbo opata wane, ivi Iesu uwane.
25Jon inaiinai meuma onanaivi me wane, ‘Ye anoene ne bira? Ne apan me onan. Go, yauya. Me ivi amanap onivi. Ne oma den ane beyawa sandoro murapeba vetna.’
26Tatangwanen, Ebraam wagobaviwa, sira ye yapeyap God gumbe aepam emewa. Waita waita gaiyawa mame nunan baraune onne.
27Jerusarem igiyawa ge namuyoiyoi mumawa mu Iesu mame den yaug anoya, sira propeta gaiyawa Sabat Kumiwa evedni basieme go mu den yaug anoya. Mu Iesu kukaeba abnawa waya, me gumbe propeta gae mumawa natawa ane.
28Mu Iesu gumbe toen guttan oya ibnawa da den yauya, megara mu Pairat me ayaya tope bototan.
29Mu Iesu oya dividivi undag aya onananewa, sira yoma korosi gumbe aug aigeg dagup danave barauya.
30Megara God ane boriruwayawa igiyawa gumbo Iesu sira inaine.
31Iesu me gaibu Gariri dauwag Jerusarem onamiyawa oiyat obiren namuwo uwaivine. Gare mu yangowo yauyawa igiyawa iyayapan numawa gumbo.
32God mamanaiwa gumbo agi wanewa nu opata ye guniyap vete.
33God Iesu warinamne yoine. Me gumbe, agi meuma me natawa wagobabiwa gunup toyau nunne. Buka Sam duwameba danave mamaib tene. ‘Ge ne utunwa. Gare ne barau genna.’
34God me Iesu bo gumbe warinamne yoine sira den di putaipe. Me gumbe me mamaib wane, ‘Ne Devid gumbe agi wanawa. Agi me iyakaisi ge natawa waribiya yentna.’
35Meoya ampa da danave mamaib wane, ‘Ge Iyakaisi Abnawa geuma oma den ane kweya putaipe.’
36Devid wakeivi kumive me God anoano meuma oya nauwawa ane. Sira me botone isimuranaiwa gumbo barauya kwapiwa putaine.
37Megara God warinamne bo gumbe yoinewa me den putaine.
38Meoya tatanaiwa, Apan mame gumbe, kukaeba anog yankwetan opataeba ye guniyap waivi ye yaiyai yaug anoya.
39Mosisi Gwangwan gumbe iyayapan mu dividivi undag gumbe oma den ane oraimina aya, megara Apan mame gumbe iyayapan desirom desirom anotumat ape ipewa, dividivi undag gumbe oraimina ape God namive.
40Ye yaimoyai yaukapa, propeta buka muma danave wayawa ye guniyap den matatpe.
41‘Yauya. Ye, ae vene igiyawa. Anopipanum aya, onanaya. Ye kum yeuma apa divi da atna. Bira da ye guniyap natawa taibe diruipe, go ye anotumat den di aya.’”
42Poru ge Banabas sinagogu kweg amomewa, iyayapan nun waya pura da umae Sabat Kumiwa gae mame sira didnuniya.
43Sinagogu daiboruwawa onanane. Ju igiyawa obiren ge God noiwa aueme anotumat mumawa tobiroriyayawa mu Poru ge Banabas amowo amiya. Mu gumbo gae waya, sira mu dirumiya God ano oraiwa meuma danave wakeigimiya.
44Pura da umae Sabat Kumiwa apa gwetoimu igiyawa koni undag God gaiyawa anotan oya agoniyaya.
45Megara Ju igiyawa mu iyayapan agoniemewa yauyawa, anokukam muma nibdanowa noidauwane, sira Poru wanewa gumbe topayak gae kukaeba gumbe veme.
46Me oya Poru ge Banabas garawa taibe mu gumbo waya, “Nu God gae meuma namu ye guniyap wapono go. Megara ye topayayana sira ye yembovit yaibobot inaiinaiba oya oma den ane yaug anog barauya. Yauya. Nu Ju onan igiyawa gumbo angetan anoete.
47Kuiyawa mamaib Ayapan did nunne. ‘Ne ana ge Ju onan igiyawa eyawa muma ana. Me ge waitawaita aug piyu viripusiwa aitan oya.’”
48Ju onan igiyawa mame anoyawa, mu degadega ake Ayapan gae meuma waiyaya. Yaibobot inaiinaiba oya wagomiyayawa munnewa undag anotumat aya.
49At me apa undag Ayapan gae meuma wateteyamiya.
50Megara Ju igiyawa God noiwa aueme ano wake wake painau vesinowa ge gwetoimu namu yoiyoi igiyawa danowa kwaikwai aya. Mu Poru ge Banabas edawai muniya mu imiya dauwag arowon amiya.

Read Apasoro 13Apasoro 13
Compare Apasoro 13:16-50Apasoro 13:16-50