Apasol 2:9-27

⁹Touda kubura bogaebogaema tapiika, mududa na Patiya, Midiya, Elam, Mesapotemiya, Jiudiya, Kapadosiya, Pontas da Eisiya.

¹⁰Praigiya, Pampiliya, Ijipt da Libiya kuburina muduna, noko na Sairin kubura ririne. Bi kate viya na touda Roum damda tavikiiwaga,

¹¹Jius waghata da kubuna damdi yadi wiigeruwana siwamira bi Jius yadi wiitumaghana sivigeruveni. Bi kate viya na Krite da Areibiya, bi mmkodi damdi tawaiwaiyanedi da God yana bera ghamanakidi iberana kiiravidiye, na toudamani yada gamoma sisisiyana.”

¹²Na tupadi sinokeni bi sinoghota kawakawa na sivitarakiiyana kabivivirana bo, “Mmko touna awaki berana?”

¹³Bi viya noko korotona kamone wiigeruwana damdi sivinamayedi, siwona bo, “Nokodi wawayidi na siniuna neghanegha.”

¹⁴Pita da apasol turaturana yadi 11 sigeghomiiri bi koroto biiyadi iwona bo, “Yagu wawaya, Jius turaturagu da iiyawogha Jerusalem kamone makamakemi. Kowaiyana wiimasi, bi mmko berana yana basuna animaghatari tami biiyadi!

¹⁵Gekonanoghosi da mmkodi damdi siyaniuna neghaneghana. Gabudara yana muyamuya 9 o'klok kawagha, katare inagepaka bi tupada takovi da rarima maragasidi na gedidibare taya niniuna.

¹⁶Gegha, raghani katamanine peroveta Jowel iwona da mmko matakirina ghamana iyatubugha.

¹⁷Igiruma da God iwona bo, ‘Raghani damona inapiika na Kanumigu anawonataveni inayowogha wawaya tupadi biiyadi. Natunatumi tomotomogha da wasiwasike sinawonakasiyaragha Anabera da yami yaraga bera gubagubadi sinakita, bi yami magumagura mimeu sinamimeu.

¹⁸Bi noko raghanidiye Kanumigu anawonataveni inayowogha yagu bagibagi tomotomoyidi da wasiwasikedi biiyadi da yagu bera kiiravine sinawonakasiyaragha.

¹⁹Berakayowiiwiiyaka abame aniyeveveyana, bi matakira kubure aniyeveveyana. Ganigani, keyama karakarasina da buu ghamana kubure konakita.

²⁰Bi gabudara inididibari bi matu kana kita inawamiri da inidura. Mmkodi bera sinatubugha bi murine na Bada yana gabudara ghamanakina inanokanibu bi noghota kawakawana.

²¹Bi naboni iiyawogha Bada kana waghawaghae wiiwiita kiiravine sinakwatu na iniyawiidi.’”

²²Bi Pita yana sisiya ivikiitayini bo, “Isrel dammi, yagu sisiya kowaiyaneni: Yesu, touna na Nasaret tomogha, bi God maragata ivereni na berakayowiiwiiyaka, bera ghamanakidi da matakira noghota kawakawadi gwabimiye ibera, noko wiiyeveveyana tami biiyadi da wiisuwona touna God gwabinama ipiika.

²³Bi God yana noghota kamone na tupana nada waghata iwonawiikim da awakigha siyatubugha Yesu biidi. Na tami wawaya kawakeekeedi siviwiitemi bi korosiye kotuparatu da koviraboboni.

²⁴Bi gegha, God rabobo sinivisina ghamanama ikabiwiigeghomiiri da iyawamagha, basuna rabobo gerubana iyakabitawani.

²⁵Na kiiwawo Deivid, mma naboni ivisisiya Yesu kiiravine, ‘Akita da Bada na nonowa gwabiguve, bi ririguve kiiravine na geananagharana.

²⁶Noko kiiravine nuwanuwagu imiise kirakii bi kawaguma akabekabepepa. Bagunakine tubuyigu inoganoga nuwanuwagu na duvine Bada iigeruveni,

²⁷basuna tam gekunakuyovegu da karawaga kamone anakena, bo yam Wiitamariyana Kabikabikuwayina tubuyina gekunakabitore da inatamoririghana.