Apanll Kamachtamarini 19:3-17

³Siyaa táchintspa; Siy aneereetsis chinangtsa; apareetstamtis chinangtamtsa. Mishat, siy ichingurus urutari kanusisush kanuskus taangtsa.

⁴Mishat, yashingoo chinarintspa. Apanllputsimun mangis tatintspa. Ayamamtiyam apanllputsee tinayarus, anoo ungirtarintspa. Nuwamari waatatana Apanlli Taarashipani.

⁵Mishat, shiyaa táchintspa, Tputs nuwapa tatsuyamaam zandkusin, mangiptis opeejareetsis karupana pachayarus, nuwaam muchingtsa. Ashkachus, nuwsha siyaa kis napchintsa.

⁶Opeejaa karupana pachayarus, anumunsha wanutsee ktungangtsa. Wandaya wanutsee katuchkachus, putam zari katungamaam wayangtsa. Itaru, anoo tuchparini zar katuchkachus, ashiriya, anootsina muchingtsa.

⁷Itaru, tputs tuchpash zar wanutsee katungkachu, nuwsha nda siyaa yutaritshishireetsis tachingchina, atina. Anoo tputs tsachikchuri, ndusha chinachina.

⁸Tputs tuchpash zar katungkachinaari, waanamandari chayarini kiyung kachiychiya. Siysa anoo tputs tsapunshis izuuru tshitungangtsa. Anoo tputs izuuru ayamta naynirintspa, watam nuwaa Apanlleetsi k'keetsi kapeeteenlluwa, siyaa atashina. Na kamaneena yuwaa Apanll Móysisee, Wanasir taangtsa, tárangu anootsi.

⁹Tirikureetsis pusamaam zar tatsamkachu, mzarshis chapung wayandapsheewa ngutaritis ksangtsa; yuw tsapush paratungtaru anoo tapuyarintspa; waani taachpa.

¹⁰Kizarunaatssha pusakus, tsapush pantsatamawaa tapuyarintspa. Izuuru ksangtsa. Pukirireew, tunareewtam tputs waani tapuychinllinpa. Nuw waatatana Apanlli Taarashipani siyaa atashina.

¹¹Mishat, siyaa tina; Shuchirintspa. Mishat, nllitaritawaa tputsi ngichintspa. Ngutis nllitaritaa tputs tamapingarintspa.

¹²Ngutis tputsee, nuw Apanllimun zureerutana áti, ngichzee ngichpi átus, tárintspa. Nuw waatatana tsinsampantana. Ashiri siy ngutis nuwaa yutaritaam ínarispa, siyaa atashina.

¹³Mishat, tputspatatis waratintspa. Mangishis chinakus, Nuwamari kasiyaruri, maachiritaa itutsichima, tárintspa. Mishat, siy tputsiris tarawaztampan taarinaari, tuwapamaam zaree zapshtarintspa.

¹⁴Mishat, tputsee mitsshartaa mantsir tsiyatintspa. Tputs wach pchusaa pantsap átus, yasin ngootsush wayarintspa. Wanasir napangtsa, watam uwin nuwaa Apanlleetsi chinaktamnawa. Nuw waatatana Apanlli Taarashipani. Ashiri siysa nuwaa kuki payungandama, siyaa atashina.

¹⁵Mishat, tputs tsiyatssee yaramaam zandku, kurakaa yaramapanee kuruzku, ¿mayaamaja kuraksha minootsimsha tputs chinayaru, minootssha niyrach? Tatsamooru k'kuzee yarachpa. Pukiriya tputs yutarit ashirangu, uru pukiree wanichtampa. Tputs putitaatiya yutariteechu, ¿mayaamaja anoo tputs puniku punich? Shiy yutarit ashirangsha; ashiriya shiyaa wanichinllpa, itsinsaru táchpa. Shiy watam kurakshawa. Ashiri mangiptish itsinsaru tsiyatangcha.

¹⁶Tputsee mantsir tsiyat, tsiyat shirintspa. Mishat, tputsee pachamaam mantsir tuchinarinllpa, siyaa atashina. Nuw waatatana Apanlli Taarashipani.

¹⁷Mishat, tputs yutarit chinaku, siysa anoo mapiyrintspa. Tputsee mangu p'tseengtsa; chinampatari waneengcha. Ndunnaa waneekus shaanaatstatam tayutaritchiya.