Apa 13:24-46

²⁴Yesuꞌa aliꞌyaꞌamo aepa faino oꞌaliꞌnigenoꞌaeꞌmo Yoniꞌa muki Isaleli vayaꞌaifeꞌmo, lapaipamo alitapa afe letetapa aniꞌmo faleyo, huno aeno hakalo huno hapa paino maiꞌniye.

²⁵Yoniꞌa aliꞌyaꞌamo alagi hogoꞌamo hano hugefeꞌmo huꞌnigenoꞌaeꞌmo, Nagaefeꞌmo ina laꞌnae, hutapa lapakesa neꞌafiye. Lapakaemo agava maiꞌnaya vekamo oꞌmaiꞌnove. Afiyo, huno, nagae nakamelegatiꞌmo egaiye. Nagaemo ina agufa vekamo maiꞌnovanageꞌna suꞌmo nofiꞌamo afaꞌa hakalu osegauve, huno hapa paiꞌniye.

²⁶Konagaꞌnimogitapae, huno, Emalehamu aginago vayaꞌe alu nofi vayaꞌmogitapa Gotifeꞌmo mono nehaya vayaꞌmogitapaꞌeꞌmo afiyo. Gotiꞌa ani alagepa geꞌamo vayaꞌai apakufamo alino katino apatesiya gemo ago alino ateꞌnigeno lapakaetegamo eꞌniye.

²⁷Yulusalemu taonifiꞌmo maiꞌnaya vayaꞌe yagaiꞌa neꞌapataya vayaꞌapimogiꞌeꞌmo Kalaisi neꞌmo maiꞌniye, huꞌa oꞌageꞌa Gotitegati gemo alini eꞌa aeꞌa hakalo huꞌa hapa nepaiya vayaꞌmogi avoꞌmo kae maleꞌnaya gemo muki sapati afinaꞌmo lekana nepaiya gemo aepaꞌamo oꞌafiꞌnayaꞌmofeꞌmo amagiyo, huꞌa huꞌnaya geletiꞌmo hogoteꞌa ago avoꞌmo kae maleꞌnaya gemo aliꞌa afole aiꞌa ateꞌnae.

²⁸Apakaemo amagisageno falisiya agufa hosu kavaꞌamo oꞌageꞌnayaꞌmonanafa Pailatifeꞌmo, amagiyo, amagiyo, huꞌa huꞌnae.

²⁹Goti Mukufatiꞌmo Yesufeꞌmo ava gemo huꞌapaeꞌmo, Ani kavaꞌmo afole aigiye, huꞌa huꞌnaya agufa kavaꞌmo agaetegamo huteꞌapaeꞌmo nilimo aiꞌa akaiꞌa alini uꞌa kiꞌa ateꞌnayaꞌmonanafa

³⁰Gotiꞌa ago alino he tino ateꞌniye.

³¹Agaemo Galeliya kotegati eꞌa Yulusalemu taonifiꞌmo lokaeliꞌa eꞌnaya vayaꞌai apaulagaleꞌmo muki afinapatiꞌmo alu afinaꞌae alu afinaꞌaeꞌmo afole aite afole aite huno maiꞌnigeꞌa ageꞌnae. Ani vayaꞌmogimo ageꞌnaya kavafeꞌmo ava gemo huꞌa aeꞌa hakalo huꞌa hapa nepaiya vayaꞌmo maiꞌnae.

³²Laꞌagaemo alagepa faigoko gemo lapa paitaꞌaeꞌmo, Gotiꞌa laginago vayaꞌaifeꞌmo lapa maesuvafeꞌmo ani kavaꞌmo huguve, huno hapa paiꞌniya kavaꞌmo apakinago vayaꞌmogitalefekeꞌmo, Yesuꞌmo ago alino he tino ateꞌniye. Ani kavafeꞌmo Goti mukufiꞌmo napa tu Samu gemoꞌa hunoꞌaeꞌmo, Hemeni afinaꞌmo aliꞌna kateꞌnogeka mafaꞌneꞌnimo maiꞌnane, huno huꞌniye, huno Samu mukufiꞌmo avoꞌmo kae maleꞌniye.

³⁴Gotiꞌa Yesu agufamo okasalisiyafeꞌmo alino he tino ateꞌniya kavafeꞌmo hunoꞌaeꞌmo, Afaꞌa lapa maeteꞌna aote yaꞌmo hanege hanege huno hanesiya yaꞌmo aliꞌna lapamiguve. Nevinifeꞌmo aliꞌna kamiguve, huꞌna ha paiꞌnova yaꞌmo aliꞌna lapamiguve, huno huꞌniye, huno avoꞌmo kae maleꞌniye.

³⁵Neviniꞌa magoꞌe gemo Goti Mukufiꞌmo avoꞌmo kae maleꞌniya gemoꞌa hunoꞌaeꞌmo, Aliꞌyakamo neꞌaliya vekamo aote vekamo oꞌataleka ha maesanageno agufamo okasaligiye, huno huꞌniye.

³⁶Neviniꞌa Goti geꞌamo akame huteno ma mopafiꞌmo agaeꞌeꞌmo lokaeꞌa maiꞌnaya vayaꞌmo hapa maeteno au kaleꞌnigeꞌa aginago vayaꞌeꞌmo kiꞌa ateꞌnageno agufaꞌamo ago kasaliꞌniye.

³⁷Nevini agufaꞌamo ago kasaliꞌniyaꞌmonanafa Gotiꞌa alino he tino ateꞌniya vekamo agufaꞌamo okasaliꞌniye.

³⁸Konagaꞌnimogitapae, huno, Gotiꞌa alino he tino ateꞌniyaꞌmofeꞌmo ani vekamo agiꞌaletiꞌmo hosu kavatapimo afaꞌa alino atalegaiye, huꞌna aeꞌna hakalo huꞌna lapa nepauve. Gotiꞌa Mosese keꞌaepa gemo akame nehaya kavatetiꞌmo hosu kavatapimo afaꞌa alino ataleteno naulagaleꞌmo fatago vayaꞌmo maiꞌnae, huno osugiye. Osugiyaꞌmonanafa Gotiꞌa ani vekaeꞌmo apakesa afiꞌa fatago nehaya vayaꞌaifekeꞌmo, muki hosu kavatapimo aliꞌna ataleꞌnogetapa naulagaleꞌmo fatago vayaꞌmo maiꞌnae, huno hapa nepaiye.

⁴⁰Ani gemo lapa nepauvaꞌmofeꞌmo Gotitegati gemo alini eꞌa aeꞌa hakalo huꞌa hapa nepaiya vayaꞌmogi Goti Mukufiꞌmo avoꞌmo kae maleꞌnaya agufa kavaꞌmo lapakufaleꞌmo afole oꞌaisiyafeꞌmo ehetapiye.

⁴¹Ani gemo avoꞌmo kae maleꞌniya gemoꞌa hunoꞌaeꞌmo, Geꞌnieꞌmo huta faipa hutapa neꞌataya vayaꞌmogitapamo afiyo, huno, Nagaemo lapaulagaleꞌmo nehuva kavafeꞌmo ava gemo huꞌa aliꞌa lapaya neꞌmalagetapaeꞌmo lapakesa afitapa fatago nosayaꞌmofeꞌmo lapau aitetapa faliyo, huno huꞌniye, huno avoꞌmo kae maleꞌniye, huno hapa paiꞌniye.

⁴²Yu vayaꞌmo mono nopatiꞌmo ataleꞌa nelamigeꞌapaeꞌmo alu nofi vayaꞌmogimo, Mago anaga Sapatifiꞌmo etana ani gemo magoꞌe hutana laha paiꞌao, huꞌa hana paiꞌnaꞌae.

⁴³Aliꞌa anupa huꞌa maiꞌnaya vayaꞌmogimo afiꞌnayana ani gemo aino atagu faeꞌnigeꞌa afiteꞌa asole Yu vayaꞌe alu nofi vayaꞌmogi Yu mono gemo neꞌafiya vayaꞌmogiꞌeꞌmo Poloꞌe Manamasiꞌeꞌmo anakame huꞌnageꞌanaeꞌmo, Gotiꞌa fiku hapa maeno neꞌapamiya kavafeꞌmo ava gemo oꞌataletapa atafauta alagi hutapa maiyo, huꞌana apakesa aliꞌana hapa paiꞌnaꞌae.

⁴⁴Mago anaga sapatifiꞌmo ani taonifiꞌmo aise vayaꞌatomo afaꞌa maiꞌnayaꞌmonanafa asole vayaꞌmogimo Ala kava neꞌmo geꞌamo afisayafeꞌmo eꞌnae.

⁴⁵Asole vayaꞌmo eꞌa maiꞌnageꞌa Yu vayaꞌmogi apaketeꞌapaeꞌmo apaipa kafamo hanaeꞌnageꞌa Polo geꞌamo amagiꞌa ataleteꞌa Polofeꞌmo huꞌa faipa huꞌa ateꞌnayaꞌmonanafa

⁴⁶Poloꞌe Manamasiꞌeꞌmo koli osuꞌana lokiya gefatiꞌmo hapa paiꞌanaeꞌmo, laꞌagaemo Goti geꞌamo hogotetaꞌa lapa paisuꞌa kavaꞌmo haneꞌniyaꞌmonanafa Goti gelegamo lapakameꞌya amitetapaeꞌmo ani kavaꞌmo hutapa lapakaitapimo agoti hutapa lapatetetapaeꞌmo, hosu vayaꞌmo maiꞌnonanageta maige maige huta maisuna vayaꞌmo oꞌmaiꞌnone, hutapa nehayaꞌmofeꞌmo lapataletutaꞌa alu nofi vayaꞌaifeꞌmo hapa paiguꞌae.