AONEGA HEREVADIA 3:3-22

³Bogahisihisi karadia bona abidadama kara danu, be do oi rakatania lasi. Oiemu aiona dekenai do oi kwatua, ma idia ruaosi be oiemu kudouna ena latanai do oi torea.

⁴Bema inai bamona oi karaia neganai, Dirava bona taunimanima ese oi dekenai do idia moale.

⁵Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi.

⁶Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.

⁷Oi sibona do oi laloa lasi oi be mai emu aonega, to Lohiabada dekenai do oi gari henia, bona kara dika dekena amo do oi raka siri.

⁸Unai bamona oi karaia neganai, inai be muramura bamona, oiemu bero do ia hanamoa, bona oiemu hisihisi do ia kokia.

⁹Oiemu uma ena anina namodia, be Lohiabada dekenai do oi henia, oiemu matauraia karana Lohiabada dekenai be unai.

¹⁰Bema unai bamona oi karaia neganai, oiemu aniani haboua gabuna be do ia honu, bona uaina be momo herea dainai, haboua gabuna dekenai atoa be ia hegeregere lasi.

¹¹Egu natuna e, Lohiabada ena matakani oi dekenai, be do oi abia dae, bona iena sisiba dekenai do oi hesiku lasi.

¹²Badina be Lohiabada ese ia lalokau henia taudia, be ia matakani henidia noho, tamana ta ese iena natuna, ia lalokau henia merona, ia matakani henia bamona.

¹³Aonega ia davaria tauna be mai moale danu. Ia ese lalona kehoa ia davaria vadaeni.

¹⁴Badina be aonega ena namo ese, siliva ena namo ia hereaia, bona aonega ena davana ese, golo ena davana ia hereaia.

¹⁵Aonega ena davana ese, davana bada herahera nadi edia davana ia hereaia, bona oi ura henia gaudia ibounai edia huanai, ta ese aonega ia hereaia diba lasi.

¹⁶Mauri daudau be aonega dekena amo do oi abia. Kohu momo bona mataurai danu, be aonega dekena amo do oi davaria.

¹⁷Aonega ese oiemu mauri do ia hanamoa, bona aonega dainai, oiemu mauri be mai maino danu do oi noho.

¹⁸Aonega idia davaria taudia be idia moale, bona aonega ese mauri namona, idia dekenai do ia henia.

¹⁹Lohiabada ese aonega dekena amo tanobada ia karaia. Iena diba dekena amo, guba be ena gabu dekenai ia atoa.

²⁰Dirava ena aonega dainai, sinavai be idia heau lao, bona ori ese medu be tano ena latanai idia hadihoa.

²¹Egu natuna e, aonega namona, bona laloa kehoa do oi dogoatao noho. Idia do oi naria namonamo, idia ese oi do idia rakatania garina.

²²Idia ese oiemu lauma do idia hamauria, bona noho namo, mai moale danu oi dekenai do idia henia.