AONEGA HEREVADIA 3:21-35

²¹Egu natuna e, aonega namona, bona laloa kehoa do oi dogoatao noho. Idia do oi naria namonamo, idia ese oi do idia rakatania garina.

²²Idia ese oiemu lauma do idia hamauria, bona noho namo, mai moale danu oi dekenai do idia henia.

²³Unai neganai oiemu dala, be do oi raka lao mai maino danu, bona oiemu aena do idia hekwakwanai lasi.

²⁴Geda dekenai oi hekure neganai do oi gari lasi, bona hanuaboi lalonai do oi mahuta namonamo.

²⁵Mase haraga dekenai do oi gari lasi. Kara dika taudia ese, dika bada do idia havaraia neganai, unai danu be do oi gari henia lasi,

²⁶badina be oi ese Lohiabada dekenai oi abidadama henia, unai neganai ia ese oi do ia hamauria. Ia ese tarapu ena dika dekena amo, oiemu aena do ia naria.

²⁷Bema dika ese taunimanima namodia ia hadikaia, bona bema oi be mai oiemu dala do oi durudia neganai, oiemu durua do oi koua lasi.

²⁸Bema oiemu badibadina dekenai ia noho tauna, be hari dina oi durua diba neganai, do oi hamaoroa lasi, “Do oi naria ela bona kerukeru.”

²⁹Oiemu badibadina dekenai ia noho tauna, hadikaia dalana do oi tahua lasi. Ia be oi kahirakahira ia noho, bona ia ese oi dekenai ia abidadama henia noho.

³⁰Tau ta do oi heai henia kava lasi, bema ia ese oi ia hadikaia lasi neganai.

³¹Dagedage taudia do oi mama henia lasi. Edia mauri daladia ta danu do oi ura henia lasi,

³²badina be Lohiabada ese kara gagevagageva taudia, ia ura henia lasi momokani, to kara maoromaoro taudia be ia ese ia abidadama henia noho.

³³Lohiabada ese kara dika taudia edia ruma, be ia hadikadia noho, to ia ese kara maoromaoro taudia edia ruma ibounai, be ia hanamoa noho.

³⁴Lohiabada ese hekokoroku taudia ia ura henia lasi, to ia ese manau taudia dekenai ia laloa namo.

³⁵Aonega taudia edia davana be matauraia namona, to kavakava taudia ese hemarai do idia davaria.