AONEGA HEREVADIA 25:7-17

⁷badina be oi do ia hamaoroa, do ia gwau, “Iniseni do oi daekau mai,” be namo, to king ena vairana dekenai, henunai gabuna dekenai oi do idia siaia lao be dika.

⁸Kara ta oi itaia vadaeni totona, kota dekenai do oi lao haraga lasi, badina dokona neganai edena bamona do oi karaia, bema oiemu badibadinai tauna ese oi do ia hahemaraia neganai?

⁹Oiemu badibadinai tauna sibona danu, emui hepapahuahu do umui herevalaia hebou, bona tau ta dekenai, oiemu badibadinai tauna ena hunia hereva do oi hamaoroa lasi.

¹⁰Badina unai hereva ia kamonai tauna ese, oi do ia hahemaraia, bona oiemu ladana be do ia dika noho, ela bona nega ibounai garina.

¹¹Hereva maorona gwauraia namonamo karana, be golo herahera siliva bosea latanai bamona.

¹²Bema aonega tauna ena sisiba hereva, be tau ta ese ia kamonai henia neganai, unai hereva be golo rini o golo herahera gauna ta bamona.

¹³Hereva mailaia tauna namona ese, iena biaguna ena lalona ia hamatamataia lou, ranu keruma ese uma anina idia utua taudia ia hanamoa bamona, idia siahu bada neganai.

¹⁴Bema tau ta ia gwauhamata, harihari gauna do ia henia, to ia henia lasi, unai tau be dika, medu idia mailaia lasi ori bona lai bamona.

¹⁵Haheauka ese taunimanima aukadia edia lalona ia hamanadaia diba, bona hereva manada ese, lohia tauna ena lalona ia veria diba.

¹⁶Bema hani oi davaria neganai, hegeregerena sibona do oi ania, momo do oi ania lasi, do oi mumuta garina.

¹⁷Oiemu badibadinai tauna ena ruma, be do oi raka vareai nega momo lasi, ia ese do ia hesiku, bona oi do ia badu henia garina.