AONEGA HEREVADIA 14:14-25

¹⁴Dala maorona ia rakatania tauna ese, iena davana metauna do ia davaria, to tau namona ese davana namona do ia davaria.

¹⁵Mai ena lalona kehoa lasi tauna ese, hereva ibounai ia hamomokania noho, to laloa kehoa tauna ese, iena raka dalana ia laloa namonamo noho.

¹⁶Aonega tauna ese Dirava dekenai ia gari noho, bona dika dekena amo ia raka siri noho, to kavakava tauna ese haheauka ia negea, bona karaharaga ia kara kava noho.

¹⁷Badu haraga tauna be ia kavakava noho, bona laloa dika tauna, be taunimanima ese idia badu henia noho.

¹⁸Laloa kehoa lasi taudia edia davana be kavakava, to laloa kehoa taudia ese aonega idia davaria noho.

¹⁹Kara dika taudia be, kara namo taudia edia vairanai do idia tui diho. Kerere bada taudia ese kara maoromaoro taudia edia vairanai, edia kwaradia do idia atoa diho.

²⁰Ogogami tauna be taunimanima ibounai idia ura henia lasi, iena badibadinai noho tauna danu, to kohu momo tauna ena turana be momo herea.

²¹Iena badibadinai noho tauna ia negea tauna, be tau dikana, to ogogami taudia ia bogahisihisi henia tauna, be ia moale noho.

²²Kara dika karaia dala idia tahua taudia, be idia kerere, ani? To kara namo karaia dala idia tahua taudia ese, bogahisihisi bona abidadama ena maino do idia davaria.

²³Hekwarahi ibounai ese davana namona idia henia noho, to hereva kava ese ogogami ia havaraia noho.

²⁴Aonega taudia edia davana be moni bona kohu, to kavakava taudia edia davana be kavakava sibona.

²⁵Hereva momokani ia gwauraia hedinarai tauna ese, taunimanima ia hamauria noho, to hereva koikoi ia gwauraia tauna ese, taunimanima ia hadikaia noho.