AONEGA HEREVADIA 12:4-18

⁴Hahine namona ese iena adavana dekenai, matauraia bona moale ia henia noho, to iena adavana dekenai hemarai ia havaraia hahine ese, iena tau ia hisihisi henia noho, turia hamanokaia gorere bamona.

⁵Kara maoromaoro taudia edia laloa be maoromaoro, to kara dika taudia edia sisiba be mai koikoi danu.

⁶Kara dika taudia edia hereva, be taunimanima alaia totona ena hereva, to kara maoromaoro taudia edia ududia hereva ese, taunimanima idia hamauria noho.

⁷Kara dika taudia idia moru noho, bona idia boio momokani, to kara maoromaoro taudia edia ruma bese taudia, be do idia mauri noho momokani.

⁸Bema oi be mai aonega danu neganai, taunimanima ese oi do idia hanamoa, to bema oi be kavakava neganai, taunimanima ese oi do idia negea.

⁹Dagi maragi dekenai oi noho, to mai oiemu aniani be namo, to oi sibona lohia tauna oi gwauraia, to oi be hitolo noho, be dika.

¹⁰Kara maoromaoro tauna ese, iena boromakau ia bogahisihisi henia noho, to kara dika taudia edia kudouna, be mai dagedage danu.

¹¹Iena tano ia gaukaralaia namonamo tauna, ese aniani momo do ia davaria, to anina lasi karadia dekenai, iena nega ia haorea tauna be kavakava.

¹²Kara dika taudia edia ura tamona, be dika do idia karaia noho, to kara maoromaoro taudia ese namo idia havaraia noho.

¹³Kara dika tauna be sibona ena hereva ese, do idia hadikaia, tarapu ese do ia hadikaia bamona, to kara maoromaoro tauna ese, kerere dekena amo ia roho mauri noho.

¹⁴Oiemu davana be oiemu hereva bona oiemu kara hegeregerena, ma oiemu gaukara hegeregerena ahuna do oi abia.

¹⁵Kavakava tauna ese ia laloa iena dala be maoro, to aonega tauna ese sisiba do ia kamonai henia.

¹⁶Kavakava tauna ese iena badu ia hedinaraia haraga noho, to laloa kehoa tauna ese, ia dekenai idia hereva dika henia neganai do ia laloa lasi.

¹⁷Hereva momokani tauna ese, hereva maoromaoro ia gwauraia hedinarai noho, to hereva koikoi gwauraia tauna ese, kara maoromaoro dalana ia hadikaia noho.

¹⁸Ia hereva haraga tauna ena hereva, be tuari kaia ia gwadaia noho bamona, to aonega tauna ena hereva ese, taunimanima idia hamauria diba.