Text copied!
CopyCompare
Buka Helaga - AONEGA HEREVADIA - AONEGA HEREVADIA 10

AONEGA HEREVADIA 10:8-27

Help us?
Click on verse(s) to share them!
8Aonega tauna ese sisiba ia abia dae noho, to hereva momo kavakava tauna, ese dika do ia davaria.
9Laloa maoromaoro bona momokani taudia, edia noho be namo, mai gari lasi danu, to kara gagevagageva taudia ese, edia kerere idia hunia diba lasi.
10Hereva momokani ia koua noho tauna ese, kerere ia havaraia noho, to sisiba hereva ia gwauraia, ia gari lasi tauna, ese maino ia havaraia noho.
11Kara maoromaoro tauna ena uduna dekena amo, mauri hereva idia mai noho, to kara dika tauna ena dagedage karadia ese, iena hereva gwauraia dalana idia koua noho.
12Badu ese heai ia havaraia noho, to lalokau ese kerere ibounai ia koua noho.
13Laloa kehoa tauna ese aonega hereva ia gwauraia noho, to kavakava tauna be do idia dadabaia be namo.
14Aonega taudia ese edia diba idia habadaia noho, to kavakava tauna ena hereva momo, ese kerere ia mailaia noho.
15Kohu momo tauna ena moni bona kohu, ese ia idia gimaia noho, to ogogami ese ogogami tauna ia hadikaia ore noho.
16Kara maoromaoro taudia ese, edia gaukara davana be mauri abia totona idia henia, to kara dika taudia edia gaukara davana ese, edia dika ia habadaia noho.
17Hadibaia hereva ia kamonai henia noho tauna, be mauri dala dekenai ia raka noho, to sisiba hereva ia negea tauna be ia raka kerere noho.
18Iena badu ia hunia noho tauna, be hereva koikoi tauna, bona samania kava hereva ia gwauraia noho tauna be kavakava.
19Hereva momo ese kara kerere idia havaraia noho, to iena uduna ena hereva ia koua noho tauna, be mai ena aonega.
20Kara maoromaoro tauna ena hereva, be siliva namo herea bamona, to kara dika tauna ena laloa gaudia be anina lasi.
21Kara maoromaoro tauna ena hereva, ese taunimanima do idia hanamodia, to kavakava taudia be mai edia lalodia lasi dainai, idia mase noho.
22Lohiabada ena hanamoa sibona ese, kohu momo oi dekenai ia henia noho, bona unai kohu danu, ese lalohisihisi sisina oi dekenai do ia henia lasi.
23Kavakava tauna ese, kara dika be iena gadara gauna ia halaoa noho, to laloa kehoa tauna ese, aonega karadia ia moalelaia noho.
24Kara dika tauna ese ia gari henia gauna, be ia dekenai do ia vara, to kara maoromaoro tauna ena ura gauna, be do ia abia.
25Lai guba do ia toa murinai, kara dika tauna ia boio, to kara maoromaoro tauna do ia gini goada noho hanaihanai.
26Oiemu gaukara karaia totona, lahedo tauna do oi abia lasi, badina ia ese oi do ia hisihisi henia, vinega ese isena ia hahisia bamona, bona kwalahu ese matana ia hahisia bamona.
27Lohiabada do oi gari henia, bona ia ese oiemu mauri lagani do ia halataia, to kara dika taudia edia mauri lagani, be do idia kwadogi.

Read AONEGA HEREVADIA 10AONEGA HEREVADIA 10
Compare AONEGA HEREVADIA 10:8-27AONEGA HEREVADIA 10:8-27