Annabi Esayi 1:6-24

⁶Kelife wo sanyi ma han wo xunyi, wo xa fefe mu lanxi. Wo xa fie ya mu ixaxi, e mu maxirixi, ture yo mu saxi e ma.

⁷Wo xa bɔxi bara kana, wo xa taae bara gan. Si gbɛtɛe na wo xa daxamui donfe wo ya xɔri, e na a birin tongofe e yɛtɛ bɛ.

⁸Siyoni taa na a kerenyi ma alɔ bage di xɛ tagi, alɔ leele naxan tixi mɛrɛ ma, alɔ taa naxan nabilinxi yaxuie ra.

⁹Xa Alatala Sɛnbɛma mu mixi ndee rakisi won bɛ nu, won bara lu nu alɔ Sodoma nun Gomora taae.

¹⁰Wo wo tuli mati Alatala xa masenyi ra, wo tan naxee maniyaxi Sodoma kuntigie ra. Wo xa won Marigi Alatala xa sɛriyɛ ramɛ, wo tan naxee luxi alɔ Gomora ɲama.

¹¹Alatala naxɛ, «N munse rabama wo xa sɛrɛxɛ wuyaxie ra? N bara luga yɛxɛ kontonyi sɛrɛxɛe ra, n bara luga xuruse bɔrɛgɛxie ture ra. Tuurae, yɛxɛɛe nun si kontonyie wuli mu rafan n ma.

¹²Nde wo xilixi fafe ra n ma hɔrɔmɔbanxi tɛtɛ kui, tife ra n ya i?

¹³Wo ba fafe hadiya fufafu ra. Surayi xiri mu rafan n ma fefe ma. Wo xa kike nɛɛnɛ salie, wo xa malabui lɔxɔɛe, wo xa malanyie, nun wo xa salie xungbee, e sese mu rafanxi n ma.

¹⁴N wo xa kike nɛɛnɛ salie xɔnxi, wo xa sali birin bara n bɔɲɛ raɲaaxu n ma.

¹⁵Wo na wo bɛlɛxɛe itala sali kui tɛmui naxɛ, n na n ya ragalima nɛ alako n naxa fa a to. Hali wo maxandie bira e boore fɔxɔ ra, n mu e ramɛma, barima faxɛtie nan wo ra.

¹⁶Wo lu fe fiixɛ kui, wo wo yɛtɛ rasɛniyɛn, wo ba yunubie rabafe n ya i.

¹⁷Wo wo matinkan fe fanyi rabade, wo lu tinxinyi kui, wo mixi kobie makiiti, wo kiridie nun kaaɲɛ ginɛe xun mafala.»

¹⁸Alatala naxɛ, «Wo fa, won xa wɔyɛn. Hali wo xa yunubie to bara wo manɔxɔ, wo nɔma fiixɛde fɔɛn. Hali e sa xɔsi nɛ alɔ garɛ gbeeli, e nɔma nɛ fiixɛde alɔ xuruse fiixɛ fate maxabe.

¹⁹Xa wo tin wo tuli matide n na, wo yi bɔxi daxamui donma nɛ,

²⁰kɔnɔ xa wo sa tondi n natinmɛde, santidɛgɛma nan wo sɔntɔma.» Alatala xui nan na ki.

²¹Yi taa luxi nɛ alɔ ginɛ naxan nu dugutɛgɛxi a xa mɔri ma a fa mɛ a ra, a findi langoe ginɛ ra. A singe a nu tinxin a fanyi ra, kɔnɔ yakɔsi a bara findi faxati ra?

²²I xa gbeti bara findi se kanaxi ra, i xa wɛni bara sunbu ye ra.

²³I xa mangɛe bara muruta, e findi muɲɛtie ra, buɲa tinxintare rafan naxee ma. Na kui e mu kiridie malima, e mu kiiti fanyi sama kaaɲɛ ginɛ xa tɔɔrɛ xa fe ra.

²⁴Alatala Sɛnbɛma xui nan ya, na xa fe ra. Isirayila Marigi Ala Sɛnbɛma naxɛ, «N ɲaxankatɛ dɔxɔma nɛ n gerefae ma, n na n gbe ɲɔxɔ n yaxuie ma.