Akt 2:18-34

¹⁸Ka seener, menaw ŋuur-ak, naa berin Ruwwiner ay wero ɗo gay riyor kuuk miday ho iŋ kuuk daaɗi. Paa kat, ŋu asiy gine nabiinnar.

¹⁹Nu asiy gine gamin kuuk ajbay dakin ka samaaner ho keɗer oki. Gee asa tale baar, ako, iŋ uc ku mooydi.

²⁰Pat asa mate ho koy oki asa newse dindik ar baar, ja kat yaa ase ƴiriy ta *Rabbiner. Ƴiriy taar-at yaarko ho gin *darjine.

²¹Wiktin taar-at, ay gem kaak inda Buŋ iŋ siŋ ku Rabbine yaa gase jile. ” »

²²Piyer ɗeeliit pey kaawoy aman : « Cokiyoŋ sellen̰, kuŋ gee ku Israyeel, ɗo taat naako kaawe. Ku iban tam kadar Buŋ gin gamin kuuk ajbay dakina ɗo ɗatikko. Ŋa ginig gamin-ak iŋ Iisa Masi kaak min geeger ka Nazareet asaan ŋaako gaare kadar ŋaar kat tabirga.

²³Gem-ak, Buŋ meen̰ji ko berkoŋ ɗo pisiŋko ar taat ŋa raktu. Ŋaar iban ko min awalle ho ŋa ictu niyine ɗo maan kaak ku asiiji gine ɗo kaay. Paa ko, ku beriig ɗo gee kuuk ibanno Buŋ a ŋuu ɗooɗin̰ ka etor kar ŋaa mate.

²⁴Kar Buŋ gay jilig min ɗo diiginey ho ŋa nooyig min ɗo muuti asaan muut ginno gudurre kaaci.

²⁵Ka seener gay, nabi Dawuud kaawko ɗo Kitamner aman : ‟ Nu talaag Rabbine uŋtu doo, ŋa goy ɗo serpar paa kat, nu galiyɗo.

²⁶Ɗo saan taar-at ko, adir gintu portiko ho kaawnar sa gintu gala, asaan nu iban kadar iŋ imaandu kat naa ɓaay jammiye ɗo uŋji ka Buŋdi.

²⁷Asaan Rabbine, ki rasinno ba oole ho ki ooyaaɗo kadar nun gemon̰ yaa zooɗe keɗer.

²⁸Ki gaarduut botol taat bera goye ho kiidu miinin̰ adir iŋ galal ɗo wiktin taat naa goye iŋ kiŋke. ” »

²⁹Piyer ɗiytu pey aman : « Gem kol siŋtay, naako kaawe waraŋ, Migite Dawuud, ŋaar mate, ŋu diyiig ɗo girpi kaak yoo diŋ oki goy kar ɗo darrite.

³⁰Kar ŋaar gay nabiin̰ce ho ŋa iban kadar Buŋ togile a gem rakki min ɗo tambaay asa tee meennaw.

³¹Sando, Dawuud ŋaar iban ko min awalle kadar Masi kaak Buŋ doɓtu asa nooye. Ɗo bi ŋaar-ak ko, ŋa ɗiytu aman : ‟ Buŋ bal rasin̰ji ɗo ɗatik ta gee kuuk mate ho ziy sa bal zooɗe ɗo maginer. ”

³²Ansii ko, nu kaawiiko aman : Buŋ nooyig Iisa Masi-aka, ho okintini, ni talig ŋa goy iŋ odinay.

³³Buŋ cooniiga, kar ŋa diyiig ɗo meeday, kar ŋa beriiji Ruwwiney taat ŋa kaawtu a ŋaaji bere. Maan kaak ŋa gastu min ɗo tacco, ŋa berintiŋ loni. Taar-an ko taat ku doriyo ho ku taliy diŋka.

³⁴Ya Dawuud meen̰ji sa, ŋaar bal coone kuwa. Kar gay, ŋa kaaw ɗo bi ka Iisa Masi aman : ‟ Rabbin kaawji ɗo Rabbiner aman : Asu goy ɗo meedar