Aklisiyestis 3:7-15

⁷en det rait taim blanga breikimap klos wen yu jidan soribala, en det rait taim blanga meigimbat nyuwan klos, en det rait taim blanga toktokbat, en det rait taim nomo blanga toktokbat,

⁸en det rait taim wen yu laigim sambodi detmatj, en det rait taim wen yu heidimbat sambodi, en det rait taim blanga wo, en det rait taim blanga jidan gudwei.

⁹Wotfo yu oldei dumbat adwek langa dijan laif? Ai nomo sabi. Im nomo album yu olagijawan.

¹⁰Wal ai sabi ola adwek weya God bin gibitbat wi.

¹¹Imbin pikimat rait taim blanga meigim ebrijing gudwan. Imbin meigim pipul jinggabat wanim garra hepin bambai, bat wi nomo rili sabi hau God im wek.

¹²Wal ai reken wi garra jidan brabli gudbinjiwei olataim weya wi jidan langa dijan laif.

¹³Wi oldei dagadagatbat en dringgimbat en wi oldei dumbat adwek. Dijan na meigim wi jidan gudbinjiwei, en ai sabi God na oldei gibit wi dijan.

¹⁴Wal ai sabi ebrijing weya God bin dum garra jidan olagijawan. Dumaji God bin meigim ebrijing brabli gudwan. Wal pipul kaan edimap enijing en dei kaan deigidawei enijing brom wanim imbin dum. God bin dum dijan, en wi ol hatjamp blanga wanim imbin dum.

¹⁵En nomeda wanim hepin tudei o enitaim, wal imbin olredi hepin bifo. God garra meigim det seimwan ting hepin igin.