Aklisiyestis 3:1-11

¹Wal ebrijing weya hepin langa dijan wel bin hepin langa det rait taim en ebrijing garra hepin igin langa det rait taim du.

²Wal ebrijing garram det rait taim blanga bon, en det rait taim blanga dai, en det rait taim blanga plentimbat sid, en det rait taim blanga gajimbat daga,

³en det rait taim blanga kilimbat enijing, en det rait taim blanga jidan gudwei, en det rait taim blanga nokamdan enijing, en det rait taim blanga bildimap enijing igin.

⁴En det rait taim blanga nogudbinji, en det rait taim blanga gudbinji, en det rait taim blanga kraikraibat, en det rait taim blanga densdensbat,

⁵en det rait taim blanga wandim sambodi, en det rait taim blanga nomo wandim sambodi, en det rait taim blanga pudum yu am raun langa sambodi, en det rait taim nomo blanga pudum yu am raun langa sambodi,

⁶en det rait taim blanga lukabat enijing, en det rait taim nomo blanga lukabat enijing, en det rait taim blanga seibum ebrijing, en det rait taim blanga tjakidawei ebrijing,

⁷en det rait taim blanga breikimap klos wen yu jidan soribala, en det rait taim blanga meigimbat nyuwan klos, en det rait taim blanga toktokbat, en det rait taim nomo blanga toktokbat,

⁸en det rait taim wen yu laigim sambodi detmatj, en det rait taim wen yu heidimbat sambodi, en det rait taim blanga wo, en det rait taim blanga jidan gudwei.

⁹Wotfo yu oldei dumbat adwek langa dijan laif? Ai nomo sabi. Im nomo album yu olagijawan.

¹⁰Wal ai sabi ola adwek weya God bin gibitbat wi.

¹¹Imbin pikimat rait taim blanga meigim ebrijing gudwan. Imbin meigim pipul jinggabat wanim garra hepin bambai, bat wi nomo rili sabi hau God im wek.