Agoago Podo 8:1-35

¹Hagalongo! Di kabemee le e gahigahi. Di iloo mee le e helekai gi daha.

²Di kabemee le e duu i hongo nia dama gonduu ala e hoohoo gi nia ala, gei e duu i nia madagoaa o nia ala e dagadagabuli ai nia daangada.

³Di kabemee le e gahigahi i di ngudu di ala dela e ulu ai nia daangada gi lodo di waahale. Mee e gahigahi hoohoo gi nia bontai di waahale boloo,

⁴“Au e dangidangi adu gi goodou go nia daangada. Au e gahigahi nia daangada huogodoo ala i hongo henuailala.

⁵Goodou digi mmaadua? Kuulu ina goodou gii hai digau e mmaadua. Goodou e aha, e dadaulia? Kuulu ina goodou gi iloo nia mee donu.

⁶Hagalongo gi agu helekai, nia helekai ala koia e humalia. Agu helekai huogodoo ala e hagi adu gi goodou le e donu.

⁷Agu helekai la go di tonu. Au e de hiihai gi nia helekai tilikai.

⁸Agu helekai huogodoo la go di tonu. Deai dahi mee e hai gee ai, be e halahalau dangada ai.

⁹Tangada dela e modongoohia eia nia mee huogodoo le e madammaa ang gi deia. Tangada dela guu lawa di haga iloo ginai, ia gu iloo nia mee huogodoo.

¹⁰Hilihili ina agu agoago, hagalee go nia silber. Hilihili ina di kabemee, hagalee go nia goolo ala e kaedahi e humalia.

¹¹Ko au dela go di kabemee, gei au koia e humalia i nia hadu hagalabagau! Di godou mee e hiihai ginai e mee di hagatau mai gi di au ai.

¹²Ko au dela go di kabemee, gei au e gidee nia mee. Au e iloo nia mee, e iloo nia mee ala e huaidu mo nia mee ala e humalia.

¹³Maa goe ga de hiihai gi nia haihai huaidu, goe le e hagalaamua Dimaadua. Au e de hiihai di bida hagaamu au, mo di bida hagalaamua au, nia haihai huaidu mo nia helekai tilikai.

¹⁴Au e hau agu bilaan ge e hai hegau gii kila. Au e iloo nia mee, gei au e maaloo.

¹⁵Au e hagamaamaa nia king i di nadau dagi, mo nia dagi tenua gi heia nia haganoho ala e humalia.

¹⁶Au e hagamaamaa digau huogodoo ala e dagi henuailala, digau huogodoo ala e aamua mo nia king.

¹⁷Au e aloho i digau ala e aloho i di au: Ma koai dela e halahala au, geia e mee di gidee ia au.

¹⁸Au ogu maluagina, di hagalaamua, di haadanga lamalia mo di gila i golo e wanga gi digaula.

¹⁹Godou mee ala e kae i dogu baahi le koia e humalia i nia goolo ala e kaedahi, koia e humalia i nia silber ala e madammaa huoloo.

²⁰Au e heehee di ala o di tonu. Au e daudali nia ala e donu.

²¹Au e haga maluagina digau ala e aloho i di au, gei au e haga honu nadau hale gi nia maluagina.

²²“I mua loo, Dimaadua ne hai au i mua i nia mee huogodoo, i di matagidagi o ana mee ala ne hai.

²³Au ne hai i di matagidagi loo, i taamada, i mua henuailala ne daamada.

²⁴Au ne haanau i mua nia moana ne hai, i di madagoaa o nia wai digi uwa aga.

²⁵Au ne haanau i mua nia gonduu ne hai, i mua di haga noho o nia dama gonduu,

²⁶i mua o God ne hai henuailala mo nia gowaa maalama o henuailala, ge i mua hogi taamada o nia gelegele o henuailala.

²⁷Au nogo i golo i dono madagoaa ne dugu di ahiaalangi gi dono lohongo, i dono madagoaa ne haga noho o lala di langi gi hongo tai,

²⁸i dono madagoaa ne haga noho nia gololangi gi di gili o di langi, mo i dono madagoaa ne haga hali nia wai o tai,

²⁹ga helekai gi nia wai o tai bolo gi honu aga hua gii tugi be ana helekai, hudee honu aga gi nonua. Au nogo i golo i dono madagoaa ne haga noho di hagamau o henuailala.

³⁰Au nogo noho i dono baahi gadoo be tangada hai bilaan hau hale. Au nogo haga tenetene a Mee i nia laangi huogodoo, gei au nogo tenetene i nia madagoaa huogodoo i dono baahi.

³¹Au nogo tenetene gi henuailala ge manawa lamalia gi nia daangada o henuailala.

³²“Goodou ala go nia dama daane, dolomeenei goodou la gi hagalongo gi agu helekai. Heia agu mee ala e hagi adu gi goodou bolo goodou gi heia, gei goodou ga maluagina.

³³Hagalongo gi nia mee ala gu aago adu gi goodou. Goodou gi kabe ina nia maa, hudee kili ina gi daha.

³⁴Tangada dela ma ga hagalongo mai gi di au, ia ga maluagina, ia go taane dela e talitali au i di ngudu dogu bontai i nia laangi huogodoo.

³⁵Idimaa, tangada dela ma ga gidee ia au, ia gu gidee di mouli, ge Dimaadua ga manawa tene gi mee.