Agoago Podo 30:3-21

³Au digi kabee ina di kabemee, gei au e de iloo a God dela e dabuaahia.

⁴Ma tangada i golo gu iloo di kabemee o di langi? Ma tangada i golo guu kumi di madangi gi lodo dono lima? Be e hii ana wai gi lodo di mee gahu? Be e haga noho nia hagageinga o henuailala? Maa goe e iloo, tangada la koai? Dana dama la koai?

⁵“God e daahi ana hagababa huogodoo ala e hai. Mee e hai be di abaaba ang gi digau huogodoo ala e halahala dono duuli.

⁶Maa goe ga helekai bolo Mee gu helekai dahi mee digi helekai ai, Mee gaa hai goe gii donu, ga hagamodongoohia adu bolo goe tangada kai tilikai.”

⁷Meenei God, au e dangi adu gi dumaalia ina mai nia mee e lua i mua dogu made:

⁸Daahia au gi daha mo nnelekai kai tilikai, heia au gi hagalee maluagina, ge gi hagalee hagaloale. Gaamai hua nia meegai ala e dohu mai.

⁹Maa au gaa logo agu meegai, holongo au e helekai bolo au hagalee hiihai gi dahi mee mai doo baahi. Maa au ga hagaloale, holongo au ga gaiaa, ga haga balumee dogu God.

¹⁰Hudee leelee hagahuaidu nia hege gi nadau dagi. Goe ga hagahuaidu mo di hagaduadua maa goe gaa hai beelaa.

¹¹Nia daangada i golo e hagahuaidu halauwa nadau damana, gei digaula hagalee haga maluagina nadau dinana.

¹²Nia daangada i golo e hagamaanadu bolo ginaadou e madammaa giagia, gei digaula e dogolia hua giibeni.

¹³Nia daangada i golo e hagamaanadu bolo ginaadou e humalia huoloo, uaa, e humalia behee go di nadau hagamaanadu bolo ginaadou e humalia!

¹⁴Hunu daangada e hai hagahuaidu digau hagaloale mo digau nadau mee ai. Deelaa di nadau hai e mouli ai.

¹⁵Tangada madamadau mee ana dama ahina dogolua, meemaa huogodoo e haga ingoo boloo, “Gaamai! Gaamai!” Nia mee e haa aanei le e deemee di hagahonu:

¹⁶- Tenua digau mmade. - Di ahina ana dama ai. - Tenua maangoo e hiihai gi di uwa. - Di ahi ulaula deemee di diinai.

¹⁷Maa goe e haga balumee do damana be e hagauwwou do dinana i di nau mmaadua, goe e humalia e wanga gi nia manu gi geina, be e wanga gi nia manu mamaangi lodo geinga gi kabe ina o golomada.

¹⁸Nia mee e haa aanei le e de modongoohia eau di iloo:

¹⁹- Di manu ‘eagle’ dela e maangi i di ahiaalangi. - Di gihaa lodo geinga dela e tolo i hongo di hadu. - Di wagabaalii dela e dele i di moana gi tenua. - Di hai o taane mo di ahina e aaloho i nau mehanga.

²⁰Deenei di mouli hai be di manu o di ahina hai lodo dela e mouli hua i dono hiihai: Mee gaa hai di huaidu, ga gaugau, ga helekai boloo, “Au digi hai dagu mee hala!”

²¹Nia mee e haa aanei le e hai henuailala gi bolebole: