Agali Mandabi 3:3-19

³Agali bo home lolene horobi warago ngaru mo dabi holene horobi ibugua dege mo ngeleda. Mbirale ngaru mo waholene horobi bayale helo wabulene horobi ibugua pongobo ngelalu bida.

⁴Dugu bialu holene horobi oba halu holene horobi ibugua dabo ngeleda. Dara holene horobi iba gana lalu mali lulene horobi ibugua dabo ngelenego nga.

⁵Agalime ibu one baba turu hagabu holenebi waho holene horobi ibugua dege pongobo winigo nga. One agalinila mini mbira ho holene horobi naholene horobi ibugua dege dabo wini nga.

⁶Mbirale mbira wahenego handa walia holene horobi mbirale yu waholene horobi ibugua dabo ngeleda. Mbirale ngelo mo wulenebi yu wahalu ba ai̱ nai̱ bulene horobi ibugua dabo ngeleda.

⁷Ibugua degeme aga budulene horobi lone lebia dai bulene horobi dabo ngeleda. Bi nale holene horobi bi lalu holene horobi pongobo wini nga.

⁸Ibugua dege mendeali gubalini ho holene horobi handabe manga ho holene horobi dabo ngeleda. Wai bulene horobi wai nabi holene horobi ibugua dege pongobo ngeleda.

⁹Biabe biaga karume tinaga biabe biragonaga lini bayale agi yu hagabe.

¹⁰Ngode Datagaliwabehanda genda mo ngiraru dege yu haga kamagoni ndobe.

¹¹Ibugua mbirale bibahende ibunime ibiloa birangi ibilaga biaga ka. Ani bialu howa ibugua inahondo mini bayale mo wia haragola iname mbirale alaore bini ngarubi mani bulubadarubi bibahendeore manda bua howa haga kamagoni. Ani kamagoyu Ngode Datagaliwabehanda mbirale ala binirubi maniore bulubadarubi bibahende ina mo walia naholebira.

¹²I̱na uruni bibahende manda bu handalu hewaria dunini mbiraore hangu wiaria handarugo ogo. Ina dindini kamangi howa mana bayale hangu bialu turu hagabu dege holene wiaria handaru.

¹³Iname tomobi ibabi nalu dungulo howa mbirale bialu karu turubi hangu bialu holene ngalo manda bido. Mbirale uruni bibahende Ngode Datagaliwabehanda inahondo bame nginida manda buwa ani bulene nga.

¹⁴Ngode Datagaliwabehanda ibunaga mana mo iriari mbira nabiaga ngago i̱ manda buore harugoni. Ibugua biniru wiaho wiaaboboore bu wulebira. Mbiralime Ngode Datagaliwabenaga mana ngagoha mo tago habe naheore wialu ibunaga mana uruni aria mbirago mo wahabe naheore nga. Ngode Datagaliwabehanda ogonidagua ngelenedagoni irane ina wali agali bibahende kamarume ibugua biniru handawa buwa ibuni andaneha hai holoma̱ya ani ngelene.

¹⁵Mbirale áyu birarunibi awe bulebirarubi uruni bibahende abale biaga winigo dege tagira pora. Ngode Datagaliwabehanda abale binidaru bu wa nahaga. Áyubi nde lone abale binidaru biadai bigi biaga ka.

¹⁶I̱na manda bialu hewaria mana lehe marubi dindi ogoria wia dege biane handaru. Wali agalime mana tigabi bayale ngaru nabi howa tigua mana ko nabulene wiaru dege mo tene howa bialu ka.

¹⁷Ani bialu kago manda buwa i̱nime lo mitangi bialu bibahende ngaru bulene horo pongobo ngangi bulebirago Ngode Datagaliwabe ibugua wali agali bayale biagarubi ko biagarubi ti dabaki bulene horo mbira manda mandabu ngago horo ogoningi bibahende dabaki bulebira lo mitangi biru.

¹⁸Ani bialu Ngode Datagaliwabehanda ina wali agali nogo biango ale dege ka lo mitangi bialu ina ba handalu ka lo manda bido.

¹⁹Anidagua larogoni irane nogo biangoru homalu ereba hagadagua ina wali agalibi nde homalu ereba haga kama. Nogo biangoru ti homagadagua ina wali agalibi nde homaga dege kamagoni. Nogo biangoru ti bu he̱ laga kadagua ina wali agalibi nde bu he̱ laga dege kamagome ina bibahende holene ogobi dege dege kama. Ani kamagome ina wali agalinaga holeneme nogo biangonaga holene bolanguahe ndo kama. Ani ndo kirabalinaga holene nagalone labolabo nga.