AFOSITOLO 15:16-22

¹⁶Aimo tova mulina Iya Yaubada Kaiwabu Devida bwaneneneyao kadu ganaꞋitanuwakabubuyedi. Bana melalina hikoyo higa yadi abavehimeya gihavaina tu Iya ganaveꞋetolakahidi. Boi bana melalina hivetovehimeya amine, meda adamoya bwanenena saꞋeyana ginavetovehimeya.

¹⁷Ginavetovehimeya be yoꞋo tulidiyao agaidiya gaveyao galuwafadi medema hinamuliyeku. E, medema moyaꞋaidi Iya Kaiwabu hinaleleku.

¹⁸Au hidedemi Iya Yaubada Kaiwabu gagahe, tuwai-moꞋena gaitomai-nadi gagaheye-vagahina.” Au hidedemi Yemesa Yaubada yana gahe giyakahina.

¹⁹Kadu gigayo, “Yaku nuwanuwa hidede amine. YoꞋo tulidiyao kalivai-dina Yaubada againe hihagaviladi-ma keke vehimeya moyaꞋaina vitana kanaveledi.

²⁰Au yadi leta kanaꞋetoladina be kanagahedi higa kevakeva kilumina agaidiya mali kaliva hihawadavadavayedi-ma keke hinaꞋuꞋani, mema kevakeva koyona. Kadu kaliva keke mali vevine buye hinadauda, meda anafaiweya vevine keke mali kaliva buye hinadauda. Kadu kevakeva kikibahidiyao dayagidi keke gidamadu-ma keke hinaꞋuꞋani. Kadu keke kevakeva dayagidi hinayuni. Au kanagahedi be hida Mosese yana vehimeya ana hawatai-dina hinaꞋitaveꞋavidi.

²¹Mosese yana vehimeya kaliva moyaꞋaidiyao hihalamanena, faꞋina tuwai-moꞋena be hinunauwena adamoya melala moyaꞋaina agaidiya kaliva Mosese yana gahe faꞋina hilulumamala, kadu sabati saꞋeyana saꞋeyana yana buki-vehimeya sinagogi agaidiya hihawahawana.” Au hidedemi Yemesa yana gahe.

²²Tu afositolo ada tovetumagana adi tonagona, kadu tovetumagana adi yoꞋo matatabudi yadi lukahihi hiluyabuna, au hivehimeya be kaliva tufoidi yadi yoꞋo agaidiya hinavenuwadadanedi, ada hinaꞋiveninisedi be Folo Banabasi Anidiyoka againe buye hinana. Au kaliva adiꞋiselu hivenuwadadanedi, adi egana Yudasi kadu hivewagana Basabasa, ada Sailosi. Au badi kaliva yamumudiyao tovetumagana matadiya.