Acts 9:26-36

²⁶Me yan Saul nga Jerusalem me guy rogon ni nge cheag ngak e pi’in gachalpen Jesus u rom. Machane de pagan’rad ngak nike mang reb i gachalpen Jesus, ya yad gubin ni yad be tamdag ngak.

²⁷Ma aram me yib Barnabas i ayuweg nge fek i yan ngak fapi apostel, me weliy ngorad rogon nike guy Saul Somol u daken e kanawo’, ma ke welthin Somol ngak. Miki weliy ngorad rogon nike machib Saul u fithingan Jesus u lan yu Damaskus nda i rus.

²⁸Ma aram me par Saul rorad me yan u gubin yang u Jerusalem i yan, ni be machib u fithingan Somol nda i rus.

²⁹Ma ki i welthin ma be malu’ag thin ngak piyu Israel ni pi’in yad ma non nthin ni Greek, machane miyad guy rogon ni ngar thanged e fan rok.

³⁰Ma fa’ani nang e pi’in walagen ni aram girdi’en Jesus, miyad fek Saul nga Cesarea miyad pi’ nge yan nga Tarsus.

³¹Ma aram mfini pir’eg girdi’en e galesiya e gapas u lan yu Judea ni ga’ngin ngu Galile ngu Samaria. Me ayuweg fare Kan Nthothup girdi’en fare galesiya nge yib gelngirad ma yad be yo’or i yan, nu ur pired ni yad be rin’ e tin nib m’agan’ Somol ngay ma yad be tayfan.

³²Me milekag Peter u gubin yang, ma ba yay e yan nga Lydda nge yan i guy e pi’in girdi’en Got ni be par u rom.

³³Me pir’eg be’ nib mo’on u rom ni Eneas fithingan, ni dariy gelngin yu yang u downgin ma nga meruk e duw ndawori yag ni nge chuw u bet.

³⁴Me ga’ar Peter ngak, “Eneas, ke gol nigem Jesus Kristus. Mu suwon ngam ngongliy rogon e bet rom.” Ka chingiyal’ nem me suwon Eneas.

³⁵Ma urngin e girdi’ ni be par u lan yu Lydda ngu Sharon nra guyed e cha’nem, me pig lanin’rad nge mich Somol u wun’rad.

³⁶Ma bay be’ ni bpin u Joppa ni Tabitha fithingan, ni be’ nib mich Jesus u wan’. (Mi Dorkas fithingan ko thin ni Greek, ni fan e re ngachal nem e ba gamanman ni dir.) Ma par ni tin ni bfel’ e be rin’ ma be ayuweg e pi’in gafgow.