Acts 9:22-32

²²Saba Jew biyisi Damascus kamonai si mamana wai nuwanuwasi i kairagaraga kega rubana awaika siti sisiyei, kairavina Saul ana rumamara i maragata saki, ba i wonewonisi kata Iesu wai Baibai yawasina Kaobaisiyena.

²³Kao pesarisi murinai Jew biyisi bibune yai si dugu kata Saul sita kasibunui.

²⁴Kao ba pom meyaga kana matamketa sibo kibukibui kata sita kasibunuina kairavina, saba matapa i kuiri.

²⁵Damanina pom wakunai bigeruwana biyisi Saul si yauni ku tegara kaikapona kamona si wani ba papa masarenai si sonagi i kasibau.

²⁶Ba maranai i botu ku Jerusalem wai ana waina Iesu ana nonorayauna ita riu ku kamosi, saba si nagarei, kairavina kega si geruwei kata kona bisuwona Iesu ana nonorayauna.

²⁷Damanina Barnabas i urabai i botu apostles kurisi ba i wonisi, awaika i tupuwa Saul kurina ba mekabage Bada i sisiya kurina, ba yebo i wonisi mekabage i sinitora ba Iesu kana wabai Damascus kamonai i rumamara.

²⁸Damanina Saul namai kosi yabata i mana ba nuwagaire yai ba ere sinitorana, Bada kana wabai i raumamara neubuwa Jerusalem kamonai.

²⁹Saba yebo Jew biyisi Greek asi gamo ai si bisisiya wai yabata si kawapata, ba asi waina sita kasibunui.

³⁰Ba maranai bigeruwana biyisi si rupanani kona sita kasibunui wai, si urabai si gakira ku Caesarea ba si porai ku Tarsus.

³¹Damanina ba ekaleisiya, Judeai Samariai ba Galilee kupurisi ereonowana nuwanuba i mana ba Kanuma Kaobaisiyena i bobimaragasisi ba i bobitorisi kata Iesu kairavina ere kumarisi ba bokuwayai si mana asi koroto i rakata.

³²Ba Peter meyaga nunusi yai i yewo neubuwa ba i botu ku Lydda wai Keresiyana i rugenarisi.