Acts 8:17-33

¹⁷Asele Peter se John nuguting patawu nusupuling te bitakasan se Bur Laili nungumik te kapakaso.

¹⁸Se tom Simon apostle ilagala nuguting kariimet nusupuling te bitakasan se Bur Laili nungumik te kapakaso mu arigam, mu nu manga nungaru se

¹⁹mam, “Nina sokel sowore ani ago aisal se, ani awiriya agiting kumik te bitirik mu agotala Bur Laili kumik te kaparukko,” mam.

²⁰Bare Peter nu maonam, “Ni ka manga sumu karogo maga namarko! Mu awuk, ni Kaem ko munan ana nangaram mu ni manga te dierko balsam.

²¹Ura ana bitawasan imi ni bitarko me terong! Mu awuk, nika gemang motam mu Kaem ilak diram me aniso.

²²Ni munan memek sumu ko, gemang motam gurugu ale Kari Biya kote guranek bitarko. Se ani nu kote la betesam, nu kota ka ikia memek gemang motam ningi mu siwu kisokko.

²³Ani arigisam mu ni motam barasa ko munan se munan memek ninguru ka taliparam.”

²⁴Se Simon nunga maonam, “Nina ani ago ko Kari Biya kote guranek beteral se, bala balman sumu ani angimik te me aratukko!” mam.

²⁵Se Peter se John Kari Biya Jesus ko dugu duap balu pagorman, asele peleman Jerusalem namakasan. Nuna nama se lage luan te, Samaria ko wonong gotektek te mu, den gilalong balu balu namakasan.

²⁶Asele Kari Biya ko engel bo Philip maonam, “Bares ale lage koma south, lage garagarayam, Jerusalem betesan ale nama Gaza aratasan wore te nama kaparko,” mam.

²⁷Se Philip barasam namakaso. Ale nama se lage te Ethiopia kari bo arigam. Kari umu nu kari dom bo, Ethiopia nunga queen Candace ko manga suen la bitaruwara. Nu Jerusalem kagin ko namaram,

²⁸ale pila se, nu ko karis te dagi se prophet Isaiah ko batoga ari ari taikaso.

²⁹Se Bur Philip maonam, “Karis owore duap te namar ale ilak ilak namarko,” mam.

³⁰Se Philip naguram pingi namaram, ale kari mu prophet Isaiah ko batoga mu kaukaso se ikiam, ale isuam, “Ni den kauwasam sumu ko nunguning ikisam e?” mam.

³¹Se kari mu balam, “Ani awuk ta ko sinararikko? Mu kari bo den imi ko duap aninga te apurok mu asele ko,” mam. Ale Philip auram se araga ilak daigam.

³²Se batoga nu kauwaram mu iwita balam: “Nuna nu sipsip iwita diruwuman ilak sipsip mora se kuera ko kuwim te ilak namaman; se sipsip gotek, kari mone batoga mu iluso bare me niaso, am kutek am bagoso iwita, nu kuring paogam ale den bo yam ta me balam.

³³Nuna ninguru ira kutuwu ilak kapaman, se awiriya bo nu sangukko mu mena. Nu kumik kuriang gue bo kariimet nunga balmonko mu mena, mu awuk, noko tom ali imi te mu bataguru taman.”