Acts 8:17-32

¹⁷Peter ba John yarosi si terei ku tepasi wai Kanuma Kaobaisiyena si yauni.

¹⁸Maranai Simon i kinani kata apostle yarosi pipiya ku tepasi si tereterei ba Kanuma Kaobaisiyena i saibisaibira wai mane i beyisi.

¹⁹Ba i wona, “Rubarubana niko maragata kota beriku wai yauku yebo ata borubaisi wai Kanuma Kaobaisiyena sita yuyauni.”

²⁰Saba Peter i kaobeyei, i wona, “Kom ba am mane yabata ko nesaira, kom ku nosi bage God ana puyo wai mane yai sita gimogimoni.

²¹Ba God ana saibira kamonai wai kega kesana kom am gawara kona kam koda e mamana, kairavina nuwanuwam wai kega totorina God ku matana.

²²Nikosi am wose goyogoyosi, ke tombubau taveyana ba ke rupari Bada kurina, kata am nuwasuya goyogoyosi, ke nuwanuwa suyana wai ina notataveyisi.

²³Ba a kinanim wai kom nuwa badobado ba piragagoyo i bonuvim.”

²⁴Damanina Simon i kaobeyisi, i wona, “Ko rupari kairaviku Bada kurina kata, awaika ko wonei wai kega kesana goyona ina tupuwa kuriku.”

²⁵Ba maranai Peter ba John, Iesu kairavina awaika si kuiri si sisiyei i kakaba wai si veramaga, ba Bada wonana Samaria kupurina meyagisi ai si rumamarei yepo ku Jerusalem si verakasibau.

²⁶Bada ana aneya i sisiya Philip kurina i wona, “Ke bomsiri kuna nae keta ku yawara mena, ba kupura momna ketana ku Jerusalem e gaigakira ku Gaza.”

²⁷Damanina i tauya, i nae wai, keta dobonai chariot kamonai Ethiopia sebare i kinani. Jerusalem yai i bopepeta yepo i botubotu. Ba kona wai Ethiopia kana taupauma wasike, Candace gaburinai ana mane kana aba potapota,

²⁸ba sebarena namai i veraveramaga wai ana chariot tepanai i makira ba peroveta Isaiah ana buka i baibaiyawa manei.

²⁹Ba Kanuma Kaobaisiyena Philip i wonei, “Ke nae chariot parinai kuna mana.”

³⁰Damanina ba Philip i vera i gae chariot ku parina, ba i nonori peroveta Isaiah ana buka i baibaiyawi. Damanina i toirubai, “Ke baibaiyavi wai basuna ke kuikuiri kona?”

³¹Ba kona i kaobeyei, “Mekabage ana kuiri, kesana kotoi ina kaobibeyebeyiku wai ana kuiri.” Damanina Philip i babai wai i geru ana ku chariot ba yabata si makira.

³²Ba wona Isaiah kamonai, i baibaiyavi wai nikasike: ‘Si naovei nanakasike sheep rutaina kasibunuina kairavina, ba sheep wotuna rutainina gamona kega, sini korokorona te tomtomni wai e ma guguba.