Acts 8:13-33

¹³Simon toun mat on itutum; ato gibui ibapataito, on Philip bisinai ima, ato on iduduran kwakwan ato bobo baiduduranis a bobo buburis ifofour on.

¹⁴Baiyoyobotis nan Jerusalem simama on dura sitatam, Samaria yangan on God an dura sibo; on mes osi Peter a John rus nan siyafares sinai.

¹⁵Osi sinai sigat mom, ato osi simisir baitutumotis auris sibayoi Ayu Kakafotin sitboai mes.

¹⁶Yabin Ayu Kakafotin on men isur orot jever tani aurin on; baise osi asir Bada Iesu Wabinai sibapataito mom.

¹⁷Namon Peter a John rus on imas sabu tefasi siyagagaien ato Ayu Kakafotin sibo.

¹⁸Simon on bobo it, ato baiyoyobotis on imas sabu tefasi siyagagaien ato Ayu si’boai. On mes Simon agim ikutetai Peter a John rus auris,

¹⁹ato iyau, “Atonio faiwar on yau mat woiteu, ato yau imau orot jever tefanai anyayagai on Ayu Kakafotin inboboai.”

²⁰Baise Peter iyafotai iyau, “Om a am agim mat on wotarab itsawar, yabin om enonosin God an siwar on agimai untobon mom!

²¹Om men wei ai bobo turin amonai unabo on, yabin om nunuam on men obin God matanai.

²²Om am bainonot komasin emon on ya baikitabir unboai ato Bada aurin unbayoi ato am bainonot komasis emon on innotburem.

²³Yau om aitem on, om nunuam on er dorem a baiboboar auman, ato om am bokomas emon on ifatumem.”

²⁴Simon on Peter a John rus auris iyau, “Arie, omi Bada aurin wonbayoi weineu ato dura ato ubikakafun on men auriu inmatar mes.”

²⁵Peter a John rus on Iesu sisasagobai an dudur a Bada an dura on sikasones isawar gibunai, osi simatabir men sinai au Jerusalem. Osi si’nan eta nenenai mafam gugudis sigaraba Samaria tafanam amonai sen on nan auris Wasagobin sikurereb.

²⁶Bada an anea on Philip aurin ikakafun iyau, “Om ebotitiwagim ato unan eta ato Jerusalem inai Gaza mafam gagaminai i’gat on nan ungat.” (Atonio eta on ari men nan sebibib on.)

²⁷On mes Philip ibotitiwagai ato inai. On etaiai on Ethiopia orot ato yasfun fofous siboseseiren, on etai ibib i’nat au go. Atonio orot on orot gagamin, ato on Ethiopia an aiwab jever an agim goa on ikakaifarai a on jever min on an baibad wabin seyoyorai, “Candace.” On orot on inat Jerusalem nan God ikwakwafirai on imatabir men an motob wa wabin carriage on tefanai i’nat. On orot on motob an wa tefanai imair iyayai i’nat ato aubairuruotin Isaiah an buk on ibiyab.

²⁹Ayu Kakafotin on Philip iyawur iyau, “Om enai ato motob an wa wabin carriage, on bisinai ebib unnanan.”

³⁰Philip iyayai irabon ato on itatam, orot on aubairuruotin Isaiah an buk on ibiyab; on mes Philip on orot itetemai iyau, “Om min usagob abifan ebiyab i?”

³¹Orot gagamin iyafotai iyau, “Orot tani auriu inau bubunag, on arimon an sagob.” Ato orot on Philip iyawur igai wa carriage tefanai ato bisinai imair.

³²On buk amonai dura ibiyab min atonio: “On foro sheep ba sibo sinai siyasubun; On foro sheep kafakakai ba usin bubunin siyasutin on men iwaf mes; On men abi dura tani iyau on.

³³On simamaiai, ato men eta totorinai sigurubabanai on. On wawan agirin auris on, men iyafan tani inkasonet tantatam, yabin On an yawas tafanamai on inat au kanfoun isawar.”