Acts 7:4-48

⁴Anina ma Abraham Mesopotamia i netawanei ma i nae da au Haran i mae. Amana iʼraḡe ma au murina God Abraham i paritawanei da marina dobuna o mamae lana kampa ita mae,

⁵Nai maranaina God eḡa Abraham doa ita verei, eḡa aburu dadadana! Wate i parivainuaḡani, da ina verei tauna ma ana epaepaia aubaii. Nai au marana Abraham eḡa natunatuna,

⁶ma God wenanare Abraham i riwei, Am epaepaia au dobu ḡela ina mae ma ina vitaunola, nai dobuna ravai taui ina rau-iviapoapoelei da madeḡa 400 ina kwa.

⁷Wate ravai, awarii e vivitaunola ana kovoḡi, ma muriai mai Israel ina opui ma wei au dobuna ina voepaepaiu.

⁸Anina ma God inibori parivai-nuaḡanana bagibagina Abraham maiteni i kauei, ma maranai Isaac i tupua ma au pom vi-8-na Abraham natuna inina i bori. Muriai Isaac natuna Jacob inina i bori, ma nanare Jacob natunatuna 12 anatapui inii i bori. Wei babadai lamna tauta noinoita.

⁹Jacob natunatuna varei Joseph i unurei ma i gimarei da ita vitaunola au Egypt, wate God tauna awarina i mae.

¹⁰Ma ana au nuabola i gagaloei. Ma God nuaulaula i verei ma i kauei da Egypt ai gulau nuanuana i vaia, anina ma i terei da Egypt i vibadei ma ana numa orana i vibadei.

¹¹Ma gomara ḡaeḡaena i ḡeta au Egypt ma au Canaan, ma vinuapoapoe ḡaeḡaena i tupua. Ma noinoita eḡa ai lam.

¹²Ma maranai Jacob i nonori da au Egypt lam, ma noinoita i paritawanei au Egypt, wei ai babara naona.

¹³Ma muriai i nae me ma wei maranai Joseph i vieḡana-melei varevareina awarii, ma kampa mai Egypt ai gulau Pharaoh, Joseph ana numa ravai i aramanei.

¹⁴Anina ma Joseph riwa i paritawanei amana Jacob awarina ma i riwei da ana numa ravai anatapui, ai maḡa 75, ita nei au Egypt.

¹⁵Anina ma Jacob i nae au Egypt. Tauna kampa iʼraḡe ma nanare natunatuna anatapui.

¹⁶Taubeui i naiana-melei au Shekem ma Abraham Hamor natunatuna awarii kokoaga i gimagimaraia, kampa i vimataveni.

¹⁷Maranai mara i tuḡereḡerei da God Abraham i paripari-vainuaḡania ita kauei, ata patara i maḡa guratana au Egypt.

¹⁸Ma Pharaoh vouna au Egypt i vibada ma tauna noita Joseph eḡa ita aramanei.

¹⁹Tauna amamata i morui ma i rau-iviapoapoelei, i egari da natunatui melamelai numei i viopuni da ita iraḡe.

²⁰Wei au marana Moses i tupua, tevera inanana aiaina. Amana ma alona natui i ḡamoi da nawaravi tonuḡa i kwa.

²¹Ma maranai tevera numei i tere-opunei, gulau natuna guguinina tevera i vaia ma i ḡamoi da natuna.

²²Ma mai Egypt ai nuaulaula Moses i viararamani ma i virewapana, babani ma nola awarina.

²³Moses ana madeḡa 40 ma i nota da ita nae ana dam ravai ita raugenari.

²⁴Ma i ʼnanai da Egyptei, Moses ana rava oina i raviravi, ma tauna turana bainei Egyptei i vunui da i viraḡeni.

²⁵Moses i notai da ana rava ita aramanei da God tauna i paritawanei da ita agui da Egypt ita oputawanei. Wate taui wei eḡa ita aramanei.

²⁶Ma maratomna Moses i nae me ma ana rava ruaḡa i viḡaiḡaiawa i ʼnanai, ma i riwei, “Taumi ava ma aiwai aubaina o viḡaiḡaiawa?”

²⁷Wate ḡaiawa tauvikareina Moses i vokaririei ma i riwei, “Tam aiai i terem da ma vibadelai bo tauai ai taurauetara?

²⁸Tam ma viraḡeniu me pom Egyptei u viraḡeni nanare bo?”

²⁹Maranai Moses wei i nonori tauna Egypt i ruba-tawanei ma i nae au Midian, wei eḡa ana dobu wate kampa i mae. Muriai dobuna wavinena i ravaḡi ma natunatuna nelarai ruaḡa i tupua.

³⁰Ma kampa i mae madeḡa 40 i kwa ma Bada ana anela au mutulua ola Sinai au ḡereḡerena tauna awarina i eḡa, inanana me ai menamenana ai aburuna rugurugui au orana i ḡeḡae.

³¹Wei i ʼnanai ma i baei ma i nae au ḡereḡere da ai arata ita tuvirevirei ma i nonori Bada i riwa i pa,

³²“Tau amamam ai God, Abraham ma Isaac ma Jacob ai God.” Maranai Moses wei i nononori i rovo kaukaua ma naona i tere-govaḡi.

³³Ma Bada i riwa, “Am ae uma ma votawanei! Wei gabuna au tepana e maimairi, lamna doa vivivireina ma Viaiainana.

³⁴A inanai menanare mai Egypt, natunatu e rarau-iviapoapoelei. Ai ora-tou a nonori ma a ḡairai da taui ata vai-tawanei. Ma marina ma nei, Tau ana paritawanem au Egypt.”

³⁵Stephen i riwa: Wei Moses na tagogina, mai Israel i parivirevirei i pa, “Aiai i terem da tauai ma vibadelai ma ma rauetarelai?” Moses i paritawaneiai da ita vibademi ma ita tereopunemi, anela i eḡaeḡa ai menamenana au poui, ana aguei.

³⁶Ma Moses taui Egyptei i ravena-opunenei ma mataira babai ma vivirewapanai i kaukauei au Egypt, Boga lebalebarina ma ai au vaḡai madeḡa 40 au mutulua.

³⁷Wei Moses-na tagogina, mai Israel i riwei, “God muriai peroveta ami damei ina paritawaneiai me tau.”

³⁸Moses Israel patarana maiteni Egypt i opu-tawanei i vitagogiei au ola Sinai ma anela Moses awarina i bababani, tauna kampa noinoita maiteni. Ma riwa mamae-nonoana i nonori ma wei lamna i veredamanei tauta awarita.

³⁹Wate noinoita Moses i parivirevirei ma au orai i ḡoei da ita nae me au Egypt.

⁴⁰Ma taui Aaron i riwei, “Nai ravana Moses, Egyptei i taravai-opunelai, tauai eḡa ata aramanei aiwai awarina i tupua. Ma tauai ai god kokoitau ma kauei da ina rauetaraveniai.”

⁴¹Anina ma bulumakau ḡaubona kokoitauna i kauei, ma pulo i apui awarina ma i amei ma i umei, da aiwai uraiei i kaukauei i vimae-ḡaeḡaeni.

⁴²Wate God taui i mae-puputei ma i voterei da ubona ma nawaravi ma madeḡa au mara i vimae-ḡaeḡaeni. Wei lamna peroveta nununai i ririweia i tupua:

⁴³Taumi ami god Molek ana numa gara ma ami ubona god kokoitauna Rephan o avarai.

⁴⁴Noinoita, God ana numagara, i avarai maranai au mutulua i mamae. Moses wei i voai, me God i viatataiei nanare.

⁴⁵Muriai Joshua noinoita i rau-etaraveni ma God ana numagara i avarai ma ana aguei i rui ma nai dobuna ravai i viopuni ma ai dobu ta vaia. Ma numagara kampa i mae da gulau David ana au mara.

⁴⁶God, David nuanuana i vai-kauei ma David i vibaḡa da tauna God ana numa ita voai.

⁴⁷Wate David eḡa numa ita voai ma natuna Solomon numa i voai.

⁴⁸Wate God ḡeḡetelerana eḡa rava uranei numa ita voavoai au orana ita mamae, me peroveta wariaḡa i riwa i pa: