Acts 7:22-33

²²Egypt-arenyel-rnem Moses renh akalty-anthek. Ra akalty inngirrek. Ranem Atyetyart ilkwanem anenh.

²³Moses ra aherrety 40-anem anenh. Ra iterrek ikwerenh-rnem Israel-kenh-rnem-warl awangk alhetyek, renh-rnem aretyek.

²⁴Ra artwa anyent arek, Egypt-arenyel artwa Israel-kenh anyent atwenharl. Ranem artwa Egypt-areny ipmek atwek, artwa Israel-kenh renh itethilek.

²⁵Moses ranem iterrek apalel, ‘Nhenh-rnemel ayenh iterl-areyel, Akngeyel ayenh arrernekarl, renh-rnem arntarnt-aretyek.’

²⁶Arlta ingwerel ra arek artwa Israel-kenh atherr atwerrerl-anenty arrpemarl. Ranem renh-atherr arrkngertewek. Ra renh-atherr ilek, ‘Mpwelanth apmer anyent-areny atherran. Ilekek-anem mpwelanth atwerreyelan?’

²⁷Artwa retangkwel ahelirrek-penhel renh ayernek, ‘Angwenhel-anem ngenh arrernek, nga atetyart anwekantherr anetyek, anwenhantherr ayern-ayntetyek?

²⁸Nga ilkelheyel ntwa ayenh ipmek atwetyek, ntwarl artwa Egypt-areny apmwerrkel atwek-apeny.’

²⁹Moses ra awek-penh ra aterel apmer Midian-warl anterrek, ikwerel aney-alpek. Awey-atherr-anem ikwerenh Midian-el anek.

³⁰Ra aherrety 40-ek-atwety Midian-el anenh. Ikwer-penhan angel anyent-anem ikwer aremirrek, apmer arlpawel, apwert Sinai-itwek. Angel ranem arwerl ampekarl-itwek aremirrek.

³¹Moses-el arwerl ampekarl renh arek, ranem ywarn iterrek. Ra arrer irremel-anem arwerl-anem arek. Ingkart-anem ikwer-warl angkek,

³²‘Ayeng Akngey ngkweng anem, Abraham-kenh Isaac-kenh, Jacob-kenh Akngey anem.’ Moses-anem aterel arrewek. Ranem akapwert kwenirrek, arwerl renh arekerr.

³³Ingkartel-anem renh ilek, ‘Ngarl yanh rtneyel amek-amek-itwel! Pwet ngkwenh ingkety-they lhelha!