Acts 5:6-22

⁶Edo mei singa da amimi bugudo uso tamo kera edo budo pon da mambusira. Mambudo gousera.

⁷Edo iji tupo simba ise, uso aro totorisira te umo ro isiri awa gae ra.

⁸Edo Peter mi uso yei sisira, “Se gane gano ingo iu ga mi betewa mo berari nangoda yei itevita?” Setiri evetu amimi mina sisira, “En gano berari awa ingoda yei itera.”

⁹Edo umo awodo setiri Peter mi uso yei sisira, “Ro edo imo iso iu ga kotari da awa edo Bada God da Asisi Kotopu bagetevi? Edo embo iso iu govetera awa mangiro ponda derido atera. Edo ungo mi imo daedo budo ponda mambadera.”

¹⁰Edo Peter awodo setiri evetu awa uso jo da durido bebetisira. Edo mei singa awa torido evetu awa betetiri gido budo ponda mambusera. Edo ponda mambudo uso iu da demo da gousera.

¹¹Edo Iesu gebe ari embobo berari de embo nenei de binga awa ingido oju be isera.

¹²Iesu da binga atopatari embobo embo da teda ari wasiri goroba de jiwae be isera edo wasiri embo nenei mi matu gae awa edo isera. Edo Iesu gebe ari embobo berari awa iji berari Solomon da gaga da dada edo isera.

¹³Edo embobo Iesu gebe ari embobo sapo edo isera awarete embo Iesu ge be ae edo isera awa kiambu oju edo gido ungo de daedo dada ae edo isera.

¹⁴Awarate embo mata Iesu ge be edo isera. Edo embo de evetu de jiwae be awa Iesu ge be edo Iesu ge be ari embobo nenei de dada isera.

¹⁵Edo Iesu ge be ari embobo mi ari wasiri goroba de era awa gido embo karu embobo awa baredo mambudo edo emboro da besi didiregedo ainda itido isera edo besi nenei tepo dirido emboro da itido isera. Edo ungo awodo edo isera ainda be awa ungo kotedo isera Peter pepeta irirari uso atiti mi karu embobo apuregarase sedo.

¹⁶Edo Jerusalem nati da nati demo da awa embo jiwae be ungoda embo karu egeregari de embo nenei asisi bebegae ungoda jo da atima isera awa budo bugujegurisera. Edo budo bugoro ungo mi eoro ewamei edo isera.

¹⁷Sadducee embobo jiwae be awa priest babojegari de ainda atisera. Edo ungo de priest babojegari de awa tini gambari isera ainda be awa embo jiwae Iesu gebe ari embobo awa ambo ambo edo isera. Awasedo ungo erido ro adera awa kotisera.

¹⁸Edo ungo Iesu da binga atopatari embobo awa bundedo embo da gajari oro da ititisera.

¹⁹Awarate tumba de Bada da asisi ewamei mi bugudo gajari oro da be awa pirigurisira.

²⁰Pirigedo Iesu da binga atopatari embobo awa budo ponda bugudo ungoda yei sisira, “Mambudo Jew embobo da tumondebain ari oro da derido embo da yei wasiri seka da ge berari awa sewo gore.”

²¹Edo asisi ewamei awodo setiri Iesu da binga atopatari embobo ro sisira awa isera. Edo ungo sipo tu busedo piri ungo Jew embobo da tumondebain oro da torido atopatadi tuturo isera. Edo priest bajari de embo ainda daedo atisera amimi setero Jew embobo da gitijijigegari torero ungo berari dada isera. Edo ungo dada edo isoro embobo nenei itero gajari oro da Iesu da binga atopapotegari embobo badi mambusera.

²²Awarate isoro embobo gajari oro da mambudo ungo Iesu da binga atopatari embobo tambae isera awasedo ungo engenembedo dada ari yei da bugudo gitijijigegari da yei sisera, “Nango gajari yei da mambera edo mangiro awa be batitibedo digari ra edo gajari oro simba ari embobo awa gajari oro awa edo gogo edo simba ititaro jirira. Awarate ungo mangiro be pirigetero nango berari torido edo embo da ave tambae etera.”