Acts 5:3-20

³Damania ba Peter Ananias kurina i wona, “Ananias, awaika kairavina Satan i badim wai Kanuma Kaobaisiyena kurina ku kwaruma ba mane mutuna ku botawani?

⁴Tano kona kom karimi yai, ba kui gimonei murinai yebo manena wai karimi yai ba mekabage ku nuwasuya wai nikasike ku kwaruma? Nikona wai kega pipiya kurisi ku kwaruma, saba God kurina.”

⁵Maranai Ananias niko sisiya i nonori wai, i gakira i peku ba i rabobo; ba ereonowasi awaika i tupuwa si nonori wai nagara i bobunuisi.

⁶Ba yaraka mutusi si riu tupuvina si sumai, ba si kabari si kasibau si dogui.

⁷Ora tonu murinai wasikena awaika i tupuwa wai kega i kuiri ba i botu i riu.

⁸Ba Peter wasikena i toirubai, “Ke woniku, kaowam yabata tano koi gimonei, ba manena ko panani wai ereonowana nina kona?” Ba wasikena i kaobeyei i wona, “Eee, maisana ereonowana ka berim.”

⁹Damanina ba Peter wasikena i wonei, “Mekabage kaowam yabata ko nuwasuya wai, Bada Kanumina ku ruruba ko terei? Ba iyabosi kaowam si dogui wai, sebasebaresi karaku matam ketai, kom yebo sina kabarim sina kasibau.”

¹⁰Ba wasikena mara kesana i peku Peter kaenai ba i rabobo. Ba yaraka si riu wai raoboraobona si kinani wai, si kabari si kasibau kaowana gwabinai si dogui.

¹¹Bigeruwana biyisi ereonowasi Jerusalem kamonai, ba pipiya mutusi nikona si nonori wai nagara i bobunuisi.

¹²Ba apostle matakira ba kituruba pesarisi si wose pipiya kamosi yai, ba bigeruwana biyisi ereonowasi mamanina sibi kesanisi Solomon ana tupatainai wai namai kesanisi.

¹³Bagunai wata si kao bigegaenisi saba kega kesana kotoi i botubotu ku kamosi.

¹⁴Saba yebo pipiya pesarisi sebasebare ba baibaine Bada si geruwei wai asi koroto i rakata ba i pesara.

¹⁵Ba apostle asi saibira damona wai, pipiya gubagubagisi si kabarisi, si kasibau ku keta basusi, ba gawara si kepana ba si terisi kata, abisiri yai Peter ita nenae wai, kemeyauna wata pipiya mutusi ita sowoisi wai, sita yawasa.

¹⁶Kata pipiya pesarisi yebo meyaga mutusiyai Jerusalem parinai, gubagubagisi ba yebo iyabosi kanuma goyogoyosi, kamosi yai si mamana wai, ereonowasi si urabaisi si botu wai si yawasa.

¹⁷Damanina ba priest kaikapona ba turaturana, kosi iyabosi wai Sadducee biyisi nuwarauwa i bonuvisi.

¹⁸Ba apostle si patumisi ba ku patuma yovena si terisi.

¹⁹Saba kona pominai Bada ana aneya patuma yovena kana matam keta i botaveyei ba i urabaisi si kasibau.

²⁰Ba i wona, “Ko nae God ana yove garana kamonai ba pipiya ereonowasi niko yawasa wauna, warana tupana ko wonisi.”