Acts 5:20-41

²⁰Angel-el renh-rnem ilek, “Tyaty Jew-kenh-warl alhenherr-arey, renh-rnem iletyek, rernem arraty-angkwarr apentetyek.”

²¹Ingkeny tyerrelhenhey-alentyel, rernem alhek tyaty ilkwewarl, renh-rnem akalty-anthetyek. Atetyart ilkwa warrkenh ikwerenh-rnem-then rernem Council-rnem akarrilek, rernem angkerretyek. Rernem angkakert-rnemek yangkelhek.

²²Tyayl-areny iltyemwerney-rnem ikwer-rnem ywarek. Rernem ilek,

²³“Anantherr tyayl-warl alhek. Tyayl renh arey-alhek martekarl ra ayntenh. Tyayl arntarnt-arey-angker-rnem arriw ikwer-itwek rtnenh. Anantherr arriw altywerilek, arrangkw-anem arey-alhek.”

²⁴Iltyemwerney-rnem-kenh Atyetyartel angka awek-penh, ra ywarn iterrek. Jew-rnem-kenh Atyetyart-rnem ywarn iterrek arrpemarl.

²⁵Artwa anyent angkakert apetyek, renh-rnem iley-alhek, “Artwernem ntwarl tyayl akwernek-rnem, rernem ingwer-rnem angka Akngey-kenh ilerl-apeyel, tyaty ilkwa Jew-rnem-kenh aketh-ampeny-itwek.”

²⁶Iltyemwerney atyetyart ilkwa iltyemwerney ingwer-rnem-then rernem angkakert-rnem akngey-alpek, renh-rnem atwey-angenh, ingwer-rnemel iltyemwerney-rnem atwekerr, apwertel wekerr.

²⁷Kwertengerl-rnem akngek Council-rnem-warl. Atyetyart ilkwa tyaty-arenyel renh-rnem ilek,

²⁸“Anwantherr arrwekel-antey arrenhantherr ilek, ‘Jesus-kenh-angkwarr akalty-anthey-angenh.’ Arrantherr Jerusalem ingkerrenh-angkwarr akalty-anthenh. Anwenhantherr ayntarrp-ileyel, Jesus atwenty-arrpantey.”

²⁹Peter kwertengerl ingwer-rnem-then angkek, “Ahern-arenyek awelhey-angenh, Akngeyekant awelheyel.

³⁰Arrantherr Jesus renh atwek, arwerl iylpeyl-atherr-warl, aylparirremel. Arrwekeleny-rneman awelhenhan Akngeyek, rarl Jesus renh itethilemel ipmepenh akemelhilek, Akngey anyent rey-antey.

³¹Akngey ra Atyetyart anwekantherr arrernek, itethiley-angker. Akngey Ingkartel renh arrernek, Israel-kenh-rnem apmwekety angkepirretyek, apmwa ingkerrenh-kety iwetyek.

³²Arrantherr ileyel, Itnweng Rlwartel ileyel arrpemarl. Rernem Akngeyek awelhenty, rernem Itnweng Rlwart-akert-anem.”

³³Council-rnemel awek, rernem ahelirrek, renh-rnem ipmek atwetyek.

³⁴Anyent ingweran Pharisee anenh, itnan Gamaliel. Ingkerrenhel renh mwerr antwenh. Ra impen Moses-kenh angka akalty-anthenh. Ranem iltyemwerney-rnem ilanthek, kwertengerl-rnem aketh-warl akngetyek.

³⁵Ra Council-rnem-warl angkek, “Artwa Israel-kenh-rnem mwantyel iletyek.

³⁶Apmwerrkel artwa anyent Theudas, ra ilelhek ra akwel atyetyart ilkwa anetyek. Artwa 400 irlkenty ikwer-angkwarr anenh arrpemarl. Artwa ingwerel renh ipmek atwek, ikwerenh-rnem anterrerrek, Artwa Impenarl atwek-kety.

³⁷Artwa anyent ingweran Judas Galilee-areny apetyek, kapment-rnem-el artwernem count-emileyel-angkwarr-antey. Artwa ingwerel renh ipmek atwek arrpemarl. Artwa ikwerenh-rnem arlperrtyirrek arrpemarl.

³⁸Alakenhaym-kety artwa renh-rnem menty-anem ipmenherr-arey. Angka nhenh apek ahern-areny-kenh anamerl ywerreyenh weth-lkwer.

³⁹Akngey-kenh angka rernemarl apek ileyelek, nthakenh arrkngert angkey-angenhan.”

⁴⁰Sanhedrin Council-rnem Gamaliel ikwer awelhek, rarl angka ilenhek, rernem angkakert-rnemek yangkelhek, rernem ahelengkw-rnem ilanthek, renh-rnem whip-el atwetyek, renh-rnem ilek, Jesus-kenh angka iley-angenh anayntetyek. Renh-rnem menty-anem tyarlewek.

⁴¹Rernem Council-rnem-kety alpek, irrkngerney-anem. Rernem inkwerelhek, Akngeyek warrkirretyek, ahelengkwel-rnemarl renh-rnem atwenh-kety.