Acts 5:18-35

¹⁸Ma Apasol i pani, ma panipani au numana i terei.

¹⁹Wate waguvarai Bada ana anela i nei da panipani numana metaetana i votawanei, ma taui i taravaina-opunei ma i riwei,

²⁰“Ona rui tempol au orana, ona mairi ma lawana vouna riwana anatapuna rava ona pariverei.”

²¹Anela i ririwei nanare, taui au tempol i rui ma rava viararamanai i vikarei. Nai maranai pirisi ḡeḡetelarana ana rava maiteni i ḡetai ma boru ḡaeḡaena e ḡoreḡorei Sanhedrin i terei. Ma rava i paritawanei au panipani numana da Apasol ita neiai awari.

²²Taui panipani au numana i ḡeta ma i baina-avei, ma i naeme da i vieḡa.

²³I pa, “Panipani numana anina i gudu-kauei, ma tauvipaipai au metaeta i maimairi; wate maranai tauai metaeta a votawanei lamna eḡa aiai kampa.”

²⁴Maranai tempol taupainina ai bada ma pirisi babadai wei riwana i nonori, taui i vinuanaina da aiwai i tupua.

²⁵Ma rava tagogi i nei ma i riwa, “Ona rautaniḡana! Nelara panipani au numana o teretereia, taui au tempol e maimairi ma rava e viviararamani.”

²⁶Anina ma tempol taupainina ai bada, ma babada ḡelaui maiteni i nae ma Apasol i neiai. Taui i rovo ma eḡa ita egari mepa da rava ḡaimei ita ravi.

²⁷Ma Apasol i neiai boru ḡeḡetelarana au naoi, ma pirisi ḡeḡetelarana taui i vitara-virevirei.

²⁸I pa, “A riwana-guratemi da wei ravana au wavana avena ota viararamana, wate ami viararamana i tua da Jerusalem i oai. Ma wei ravana tarana wavuna tauai o vereverelai.”

²⁹Ma Peter Apasol ḡelaui aubai i vitauvibabani i pa, “Tauai God ana voteletelei ma eḡa rava.

³⁰Taumi Iesu au korosi o tuparatui ma o viraḡeni, wate amamata ai God Tauna i vovaimairini.

³¹Ma marina Tauna God au oiena e kiakiala, Tauna Bada ma Tauvilawana, Da mai Israel ai ḡoʼapoapoe ina rupeni, ma ai ḡoʼapoapoe ina nota-tawanei.

³²Ma tauai Arua Vivivireina maiteni wei kauai anatapui mataielai a inanai. Ma nanare God Arua Vivivireina i paritawanei rava votelatelai awari.”

³³Taui wei babanina i nonori ma amloi i ḡaiḡai kaua, ma i ḡoei da Apasol ita viraḡeni.

³⁴Wate Pharisi ma tarawatu badana wavana Gamaliel, rava anatapui wei ravana e vivivirei. Tauna Sanhedrin boruna au orana i mairi, ma rava i riwei da Apasol i opunei au doa mara aburuna ava.

³⁵Anina ma ana rava i riwei, “Mai Israel, ona inana kaua ma muriai da aiwai wei ravai awari ona kauei.