Acts 4:8-34

⁸Me Peter, nib sug ko fare Kan Nthothup e fulweg ngorad ni ga’ar, “Gimed e pi’in gimed be yog e thin rok piyu Israel nge gimed e pi’in pi’ilal:

⁹fa’anra kan fithmow e daba’ u murung’agen e ngongol ni bfel’ ni kan rin’ ngak fare mugutgut nge rogon nni golnag,

¹⁰me ere susun e gimed gubin ni go’ ngam nanged, nge urngin e girdi’ nu Israel nsusun e ngar nanged, nre mo’on ni ba’aray nib sak’iy u roy u p’eowchemed e kari gol ni gelngin fithingan Jesus Kristus nu Nazareth e ir e ke golnag — ni ir fa’anem ni mu kuruth niged nge mu’ me faseg Got ko yam’.

¹¹I Jesus fa’anem ni fa’ani be weliy e babyor nib thothup murung’agen ni be ga’ar, ‘Fare malang ndariyfan u wun’med e pi’in gimed be toy e naun e yan i aw ni aram e re malang ni ir e ba th’abi ga’ fan.’

¹²Kemus ni Jesus e rayag rok ni nge thapeg e girdi’ ngak Got; ya dakuriy yugu reb e ngachal ngabang u roy u fayleng ni pi’ Got ngak e girdi’, ni ir e rayag rok ni nge thapegdad ngak Got.”

¹³Me gin girdi’en e re ulung nem ngak Peter nge John ngarogon ndarir rusgow, ma ku ra gin gad ngorow ya ra pir’eged ni yow l’agruw ndariy e sukul rorow. Miyad nang ni yow l’agruw ni’ ni ur unew i yan ngak Jesus.

¹⁴Machane dariy ban’en nrayag ni ngrogned, ya yad be guy fare mo’on ni kan golnag nib sak’iy u rom ni yad Peter nge John.

¹⁵Ma aram miyad yog ngorow ni ngranow ngar chuwgow u lan fare senggil ni tafen e mu’ulung, ma aram me tabab fa pi’inem ko puruy’.

¹⁶Miyad fith rorad ni lungurad, “Mang e ngad rin’ed ko gali cha’nem? Ya urngin e girdi’ ni be par u roy u Jerusalem e yad manang nre maang’ang ney ndawor ni guy bi’id e yow e kar ngongliyew, ma dabkiyag ni ngad mitheged murung’agen.

¹⁷Ma fa’anra ngan ayuweg e re bugithin ney ndab ki wear ko girdi’ i yan, me ere ngad motochiyelgad ngorow ndab kur weliyew murung’agen e re ngachal nem ni Jesus ngak be’ bayay.”

¹⁸Miyad piningrow nga senggil bayay ngrogned ngorow ndakuriy e ngiyal’ ni ngar weliyew fa ra machibgow u fithingan Jesus.

¹⁹Machane me fulweg Peter nge John ngorad ni lungurow, “Gimed e ngam turguyed ko bin ngan e bmat’aw u p’eowchen Got, ko ngan fol romed ara ngan fol rok Got.

²⁰Ya dabiyag ni nge dab kug weliyew e n’en ni kug guyew nge n’en ni kug rung’agew.”

²¹Me ri motochiyel fare ulung ngorow nike el merin, nge mu’ mi ni pagrow. Ya dar pir’eged tapgin ni ngan gechig nagrow, ya urngin e girdi’ ni yad be pining e magaer ngak Got ni bochan fa’anem nike gol.

²²Ma re mo’on ni ba’aram nni golnag e ke pag aningeg i ragag e duw yangren, ni rogon nni golnag e reb e maang’ang.

²³Ma yugu nap’an nni pag Peter nge John, miyow sul ko fare ulung rorow mrognew ngorad e n’en ke yog e pi’in pilungen e prist nge pi’in pi’ilal ngorow.

²⁴Ma fa’an rrung’aged, ma yad gubin nra meybilgad ngak Got ni lungurad, “Masta, ni gur e mu sunumiy e tharmiy, nge but’, nge day, nge urngin ban’en ni bay u fithik’ e pin’ey!

²⁵U daken fare Kan Nthothup e mu welthin riy u l’ugun e chitamangimad i David, ni ir e tapigpig rom, ni fa’ani ga’ar: ‘Mang nike damumuw e pi’in Gathi yad piyu Israel, mang ni tay e pi nam e makath nib m’ayfan?

²⁶Pi pilung nu fayleng e ra fal’eged rogorad, ma pi’in yad be yog e thin e ra mu’ulunggad ngar puruy’gad nib togopluw ngak Somol nge fare Messiah rok.’

²⁷Ya riyul’ ni Herod nge Pontius Pilate e rabow nga ta’bang u lan e re binaw ney ngar puruy’gad e pi’in Gathi yad piyu Israel nge girdi’ nu Israel nib togopluw ngak Jesus, ni ir fare tapigpig rom nib thothup, ni ir fa’anem ni mu tay ni Messiah.

²⁸Ra mu’ulunggad ni ngar rin’ed urngin e tin kem’ay i duwgiliy rom ni ngan rin’, ni gelngim e mu duwgiliy ngay.

²⁹Somol, mu changar ko tin karogned ni yad ra rin’ ngomad, ma ga ayuwegmad e pi tapigpig rom nggu weliyed e thin rom ndab kug rusgad.

³⁰Mu k’iyag pa’am ngam golnag e girdi’ ma gguy rogon nge yag nni ngongliy e pin’en ni yira ngat ngay nge pi maang’ang u daken fithingan Jesus ni ir e tapigpig rom nib thothup.”

³¹Ma fa’anra mu’gad ko meybil, me rur fa gin’en ni kar mu’ulunggad ngay. Ma yad gubin ni yib i suguyrad fare Kan Nthothup miyad tabab i weliy e thin rok Got ngak e girdi’ ndaki yib e marus ngorad.

³²Me yan i par ni pi’in ke mich Jesus u wun’rad e ke ta’reban’rad. Ma dariy bagayad ni be yog ni tin bay rok ban’en e go ir e fen, machane urngin ban’en ni bay rorad e ur ayuweged yad ngay ni yad gubin.

³³Me ri yib gelngin e pi apostel ngar weliyed murung’agen e fos ko yam’ ni tay Somol Jesus, me ri ayuwegrad Got ni yad gubin.

³⁴Me yan i par e re ulung rorad nem ndakuriy be’ riy ni be gafgow u ban’en. Pi’in bay e binaw ntaferad ara naun e bayi n’en miyad pi’ ni chuway’, mra feked e salpiy riy i yib