Acts 3:1-18

¹Kao kesana rabisi yai 3:00 nanakasike, Peter ba John si gegae God ana ku yove pari kairavina.

²Ba namai sebare kesana i tupuwa goyo digadigana, si kabari si gegae God ana ku yove matam ketana, te yoreyorei Matamketa Kepamarina, ba kao patepatena namai si tereterei ba pipiya si riuriu God ana ku yove si riuriu wai ku riurisi i bikawakinana.

³Ba maranai Peter ba John i kinanisi si riuriu wai, kurisi mane kairavina i kawakinana,

⁴saba Peter ba John totorina sebarena kurina si kinana ba Peter i wona, “Ke kinanikai!”

⁵Ba sebarena i kinana i kinanisi, i nosinosi bage awaika kesana sita berei.

⁶Saba Peter i wona, “Yauku silver ba gold kega ba awaika kariku ai e mamana wai ana berim. Iesu Keriso Nazareth biyina, kana wabai a wonewonim, ke msiri ba ke yewo!”

⁷Damanina ba Peter yarona kasunai i yauni ba ibo bimsiriyei. Ba mara kesana kaekaena si yawasa ba si maragata.

⁸Ba i sou kaenai i msiri ba yewo i dagui. Damanina i yewoyewo ba i bisusou, ba God i bokabakabari ba yabata si riu God ana ku yove mena.

⁹Ba maranai pipiya ereonowasi si kinani i yewoyewo, ba God i bokabakabari

¹⁰wai si kuira momei, kata kona wai mamanina God ana yove matamketana, kana waba Nuwarubaruba naonai i makimakira ba i bikawakinana, ba awaika kurina i tupuwa wai, si sikwanei ba si nota kabakabai.

¹¹Ba bibikawakinina karaku wata Peter ba John kurisi, i bokikita i mamana wai pipiya ereonowasi si wareyei, ba si vera si botu kurisi Solomon ana ku tubotaina.

¹²Maranai Peter nikona i kinani wai, i wona, “Agaee! Kata Israel biyimi, awaika kairavina niko wose ko sikwanei? Kinanina bage maruwapimi naki wai kobi kita garegare, nanakasike bage yakai yebo, ama maragatai, ba ama gairenai ka wosei i yewo?

¹³Saba Abraham, Isaac ba Jacob ba nosinosita asi God, ana saibisaibirina Iesu i kadarei. Niko Iesu kesanina Pilate i boterei ita nae, saba ko totoyanei ba ko bere taveyei.

¹⁴Saba kona wai Baibaiyawasina Kaobaisiyena ba saba Pilate koi babai wai wasana kasibunuwa pipiyina i botaveyei i nae.

¹⁵Komi yawasa ketana ko kasibunui, ba saba God rabobo ai ibo bimsiri. Ba yakai yebo yabata mataki yai ka kinani.

¹⁶Kona Iesu kana wabai kai tumagana wai, niko sebare ko kinani ba ko kuiri wai i yawasa. Kata kona Iesu kana waba ba bai tumaganai, wai kona i yawasa. Kata karaku nina ereonowami ko kinakinani.

¹⁷Ba warewaresiku, karaku mosi a kuiri kata, ami babada yabata awaika ko wosei Iesu kurina wai, ami kita bigaruwana tepanai.

¹⁸Ba kona wai God matapa naki i mamatara ana peroperoveta kurisi, kata Baibaiyawasina Kaobaisiyena ita paiwara, ba nanakasike i tupuwa.