Acts 2:3-22

³Ale hinau hai sohena pepe hapu, la pala isara la sakele aulu na patura hatehateahi.

⁴Ale enira mo isoiso, Tanume Tapu mo sohonira, ale la tapulo retireti na leo tinatinapua sohen Tanumen God mo tinar̃ihira hinia.

⁵Hin rani atu, Jew matuvana na jara tari na varama sei r̃omira mo r̃ilangi mata nora rasua la lo toho atu Jerusalem.

⁶Ale vaore tavera atu, mo vai na vao tamlohi la mai jara matea, ale la hutura matan enira hatehateahi la rongora la lo retireti na leora.

⁷Ale la hutura, la mar̃urahi tavera lara, “Avei, la tamlohi nike, la sopo mara Galilee nakonako?

⁸Ale mata sava natu r̃a lo rongora la lo retireti na leo jarar̃a hatehateahi sei r̃a vora hinira?

⁹Enr̃a mara Pathian, Medes, Elamite ale mara Mesopotamia, Judea, Cappadocia, Pontus, Asia,

¹⁰Phrygia, Pamphylia, Egypt ale jara hai Libya na lolon Cyrene, ale hai la tai Rome.

¹¹Tatuar̃a Jew, tatuar̃a enira la tamlohi r̃or̃oha sei la lo usuri Moses, ale mara Crete peresi na mara Arabia — r̃a rongora la lo retireti na leor̃a. La lo vere na vavahinau r̃uhu mata suiha non God.”

¹²Ale enira mo isoiso, la mar̃urahi la hutura, la lo vereverera hinia lara, “Matamata mata sava nahai?”

¹³Pani tatuara la kerehira lara, “Hara sei, la drong na waen meji!”

¹⁴Ale Peter peresi la tupu sangavulu r̃omana matea atu, la turu mai na nahora, ale mo ulo mo verea isara mara, “Mara Judea, ale mara Jerusalem tari, ha tapurongo! Ha levosahi mamahuni hinau nike!

¹⁵Matan la tamlohi nike la sopo drong sohen ka lo r̃omr̃omia, matan mo pa lo r̃alavuho purongo nahai.

¹⁶Pani hinau nike pr̃ovet Joel mo verea moiso mara,

¹⁷‘God mo verea mara: Na pongi hitahu, a pa surei na Tanumeku na tamlohi tari, ale natumim peresi na venatumim la pa retimangovi, ale uluvoumim lamane la pa hite na hinau sohena mavuho a pa vujangia isara, ale vajiahamim a pa silera na mavuho;

¹⁸hin pongi atu sohena, a pa surei na Tanumeku isana noku slev lamane peresi na slev har̃ai, ale la pa retimangovi.

¹⁹Ale a pa vujangi na matamata mar̃urahi tavera aulu na masapa, ale matamata mata r̃ae, hapu peresi na asu hapu atano na varama,

²⁰ale alo i pa posi i mai i r̃or̃oha, majhi vitu i pa hahara sohena r̃ae, la pa pala tiroma hin rani atu Moli i pa mele mai, rani tavera atu i pa r̃uhur̃uhu jea.

²¹Ale rani matea i pa mai vara sava tamlohi la tau na nora rasu na hijan Moli la pa juri.’”

²²Ale Peter mo mele verea mara, “Tavtavuin Israel, ha tapurongo! Iesu mara Nazareth, tamlohi matea God mo taua na nahomim, mo lo vai na vavahinau mata suiha, matamata r̃uhur̃uhu tavera, peresi na matamata mar̃urahi sei God mo vaira na nahomim hin Iesu, sohen kamim mo isoiso ka levosahi mamahunia —