Acts 2:14-46

¹⁴Se Peter apostle 11 mu nongorak barasu sanamaram ale kuring biya la kariimet umu nunga manarukaso, “Nanga sikisaki Juda alo, se nina awiriya taiman Jerusalem bagasan, mu nedegawa tagiralko. Ani mel imi ko duap ninga manik se ninguru ikialko.

¹⁵Nina balsan kariari imi yu naman ale ngualaman masan, bare mena. Kariari imi yu me naman. Imi 9 o’clock tumongola pa!

¹⁶Mena, munan imi prophet Joel maingkala ko balam bore; nu iwita ko balam:

¹⁷‘Kaem iwita baluwoso, tom nukum te ani Bur Laili bitirik se kariimet suen la nunga ningi kaparukko, mam. Se ninga namarari se ninga nanawusari mu agiring tamon ale agiring diram la balu pagarmonko. Se ninga kari kulak mu kausa yumura sang arigimonko, se ninga kari garuk mu ipingira arigimonko.

¹⁸Tom mu te aga ura kariimet, kari ta imet ta, mu Bur bitirik se karogo terong mamon ale aninga den balu pagarmonko.

¹⁹Ani mel koma kigilik taiti gomang ko bitirik se aratukko, se ali te mu betelatala kausa duap duap, gue, tama se tama bur biya bitirik se aratukko.

²⁰Worem motam tiromorom paguk, sige motam gue iwita guar mauk, asele Kari Biya ko tom biya, nguangara ago, umutang aratukko.

²¹Se awiriya Kari Biya nup te airuk mu saonga taukko.’

²²“Nina Israel kariimet, den imi ikialko: Jesus, Nazareth kari, mu Kaem kota ningaram. Miracle suen biya se kausa duap duap Kaem noko ningi bitakaso se nenenga ningi aratukaso, mu nina nengeta arigiman ale ko ikiman.

²³Kaem kota ko gomang ikia te aniram uwutata, kari umu nina nigiting te beteman; se nina ninga kari memek ago nu tam kangono te tagiman se kueram.

²⁴Bare Kaem aking maraguwuram se barasam, ale mateng ko sokel menawuram, mu awuk, mateng ko sokel nu kiarukko mu me terong.

²⁵Se David iwita noko ko balam: ‘Ani arigisam mu Kari Biya ani pempem agarak bagoso; nu ani agiting duap ningi aga iluso, bore te se ani gek am bagasam.

²⁶Bore te se ani angamang kua kaposo se noko balikko mu ninguru amilmilasam; ale angimik guang lilim ago nu te la loaga lagasam.

²⁷Mu awuk, ni ani kuera mutim ningi me aga ari daleluwurko, ani nika Kakirip Laili aga bitar se me maga iwi namarikko.

²⁸Ni bagara aolak ningo pempem te bagara ko lage mu ni aninga kausem; ni ani agarak bagasam ewere te se ani amilmilarikko.’ ”

²⁹Peter den kunasaram ale mam, “Aga singsang, ani wetang te ninga manorsam, anananga taleng David kueram se mutim tugu gilingiman, se ko ali motam mu nangarak aitak aniso.

³⁰Bare nu prophet, se Kaem den nu maonam ale ilak kaolam mu nu ikiam, mu noko gue te king bo aratukko.

³¹Nu mel uragi biya aratukko mu ari ikiam, ale Kristus ko kuera ale barasa mu ko balam, ale mutim ningi me baga laga, kumik guang me iwi maga namarukko mu ago tala ko balam.

³²Kaem Jesus imi maraguwuram se barasam, se ana suen la mu namotam nunguning te arigiman.

³³Ale aitak nu nama tarigiram ale Kaem ko kuting sengam mu te nup biya tuam se bagoso. Ale nu Bur Laili, Ba ulengkala tuokko balam mu tam ale borta beteram se tai kaparam, mu ko sokel te nina aitak anananga ningi anapeya arigisan ale ikisan.

³⁴“Mu awuk, David mu Jesus iwita barasam duruk wonong te me namaram, bare nu balam, ‘Yawe aninga Kari Biya iwita maonam: Ni kuwim nup ago agiting sengam mu te bager se,

³⁵ani kari memek nunga menawu siwik duap ningi nunga awurekko, mam.’

³⁶“Buta se nina Israel suen la mel imi ko ninguru ikialko: Jesus nina tam kangono te tagiman mu Jesus borta, Kaem nu Kari Biya ko beteram se nu Kristus.”

³⁷Se kariimet den umu ikiman se den umu nongomang ninguru batogam. Se nuna Peter se apostle alo nunga manorman, “Nanga singsang, ana awuk manakko ya?” maman.

³⁸Se Peter nunga maonam, “Nina suen la nengemang motam gurugal, giris palagal ale Jesus Kristus nup te anuwa marak tal, se Kaem ninga memek siwurok se nina Bur Laili mu munan iwita talko.

³⁹Mu awuk, munan umu balu beteram se aniso; munan umu nenenga se ninga kuriang nunga se, kariimet saki awar bibiya mu nunga agotala, awiriya Kari Biya anananga Kaem mu noko ma nunga balam mu nunga tala.”

⁴⁰Se Peter den suen biya te sinar den agotala nungarukaso, ale den aora tala nunga maonam, ale mam, “Nina tom imi ko kariimet memek umu nongorak memek tal bore ko, ninimi bataguru talko!”

⁴¹Se kariimet Peter ko den ikiman ale nongomang motam guruguman mu anuwa marak taman. Se anuwa marak taman mu 3000 iwita, se nunga gi giriwuk la mu ago nunga biguwuman.

⁴²Nuna pempem la ilu biguwukasan ale apostle alo nunga kausa den ikikasan, ale biguwura la inang nunumi tui no se pasa inang karogo nokasan ale guranek bitakasan.

⁴³Se munan umu te kariimet suen la nuguring menayakaso se iki gurugu se bagakasan; se apostle alo nuguting te miracle se kausa duap duap aratukaso.

⁴⁴Nongomang ningi nunguning alo mu nunumi nongomang suanta baga se, mel aguwaya ta wore wewe te nunumi tui nokasan.

⁴⁵Nuna nunga ali se melmasak diakasan ale koma manga tokasan ale nunga saki mel ko tukunang mu te nunga sangarukasan.

⁴⁶Tom suen biya nuna temple ningi nunumi ilu biguwukasan. Ale nunga kawam koma koma te biguwukasan ale nongomang ningi nunguning te amilmil te inang nunumi tui no gi se,