Acts 2:13-36

¹³Yurru wiripu-guḻku'yunydja yolŋu'-yulŋuyu wakalliliyaŋalana walalanha ŋunhimalayi ŋäṉarrlili, ga waŋana bitjarra warray, “Dhuwalinydja dhuwali walala leŋu yukurra ŋänitjiyu,” bitjarrana.

¹⁴Bala walala ŋunhi bo'puyŋunydja djingaryurruna yukurrana rrambaŋina, bala ŋayi Betanydja dhunupa yatjunna waŋa wirrkina malamirriŋuwalana yolŋu'-yulŋuwala bitjanna, “Nhuma Djuws ŋilimurru mala, ga bukmak nhuma wiripu-guḻku' ŋunhi nhuma yukurra nhina dhiyala Djurutjalam. Ŋäka walala ŋarranha; ŋarra nhumalaŋgu yurru dhuwala ḻakarama nhä dhuwalayi ŋunhi mayali', dhuwala gam':

¹⁵Nhumanydja guyaŋina ŋanapurrunha yanapi ŋanapurru leŋumirri walala. Bäyŋu warray, liŋgu dhuwalanydja dhuwala goḏarr' muka walunydja!

¹⁶Dhuwalanydja dhuwala ŋunhiyi yulŋunydja, ŋunhi dhäwu'-gänharamirriyu yolŋuyu yäkuyu Djawulyu ŋäthili wukirri, bitjan warray yukurra ḻakarama gam',

¹⁷‘Gunhuny'tja waŋa yukurra bitjanna, “Ŋarra yurru bitjan djäma ŋuriŋinydja dhä-yawar'yunarayunydja waluyu; Ŋarra yurru rarryunna ŋarrakuway Garrkuḻuktja Birrimbirr bukmakkala yana yolŋuwala walalaŋgala. Bala nhumalaŋgala yurru gäthu'mirriŋuyunydja walalay, ḏarramuwurruyunydja ga dhäykawurruyunydja ḻakarama yukurra ŋarrakuŋu dhäruk dhunupana yana. Nhumalaŋgala yawirriny'thu yurru yukurra nhäma rumbalnha maḻŋ'thunara, ga walala worru'-wurruŋuyunydja yurru yukurra nhäma maḻŋ'thunara bukaway'kurru.

¹⁸Yo, ŋulinyaramirriyuyinydja waluyu ŋarra yurru yukurra rarryunna Walŋanydja ŋarrakuway ŋarra wal'ŋu ŋurikala ŋarrakalayŋuwala djämamirriwalanydja walalaŋgala, ḏarramuwurruŋgala ga dhäykawurruŋgala djämamirriwala, bala walala yukurra yurru waŋa dhäruktja

¹⁹Ŋarranydja yurru djäma yukurra biyapulnha wal'ŋu ganydjarr bathalana; nhuma yurru yukurra nhäma ŋunha djiwarr'lilinydja ga dhipala bäymalili munatha'lilinydja, ganydjarr biyapulnha ṉirryunaramirrina yurru maḻŋ'thun yukurra yurru, balanyarana bitjan gulaŋnha ga gurthana, ga ŋawulul ṉoluŋdhirri yurru marrtji gaŋgathirri.

²⁰Ga walunydja yurru warumukthirrina ŋunha gärakŋuranydja, ga ŋaḻindi yurru miku'yirrina gulaŋdhirrina. Yo, wäŋanydja dhuwala munatha' ga djiwarr' yurru wiripuŋuyirrina, yurruna ŋayi yurru Garraywunydja ŋunhi dharrpalnydja walu galkithirri. Liŋgu Garrayndja yukurra yurru gurku'yunna ŋurikiyinydja waluwu, ŋunhi ŋayipina yurru Garraynha maḻŋ'thun rumbalnha.

²¹Ga ŋulinyaramirriyunydja ŋunhi ŋayi yurru yukurra rarryun nhanŋuway ŋayi Birrimbirr Walŋamirri, ŋayi yurru Godthunydja ŋula yolnha yolŋunha walŋakumana, ŋunhi ŋayi yurru ŋunhiyinydja yolŋu gawaw'yun Godkunydja, yäkuyu Garraywala Djesuwala.” ’ Ga bitjarrayina ŋayi Godthu yukurrana ḻakaraŋala ŋäthilinydja.

²²“Nhuma yolŋu walala Yitjuralpuyŋu, ŋäka walala dhuwala dhäruk. Yol ŋunhi ŋayi ḏarramu Djesunydja wäŋawuy Natjurippuynydja? Nhäyinyara ŋayi ŋunhi yolŋunydja? Godthunydja yukurrana ŋayipina milkuŋalanydja ḻakaraŋala ŋanya Djesunha, ŋunhi ŋayinydja ŋulaŋuru Gunhu'wuŋu djuy'yunara, liŋgu djämanydja ŋayi yukurrana Godthu balakurruyina Djesuwalaŋukurru, ga nhumanydja ŋunhi dhiyaŋunydja walalay nhumapinydja nhäŋala muka ŋanya, ŋunhi ŋayi ŋuli yukurranha djäma ganydjarr-ḏumurru ŋunhi rom ga ṉirryunaramirri.

²³Ŋayinydja Godtja ŋäthili yana marŋgithina dhiyakuyi, ŋunhi walala yurru yolŋu'-yulŋuyu goŋ-wekama ŋanya Djesunha nhumalaŋgalana bunharawunydja, yurru Godkuŋu ŋunhiyi dhukarrnydja nherraṉaranydja ŋurikiyi ŋäthilinydja wal'ŋu yana. Ga yuwalknha dhuwalayi malŋ'thurrunanydja. Nhuma bumarana ŋanya Djesunha; nhumana ŋanya wekaŋalanydja ŋurikala yätjmirriwalanydja yolŋuwala walalaŋgala bunharawu ŋurikinydja ŋal'maranharawu dharpa-liliyanharawunydja.

²⁴Ga rakunydhinana ŋayi ŋunhiyi, yurru Godthunydja ŋanya ŋunhi walŋakuŋala warray beŋuru rakunyŋurunydja, dhayaḻakuŋala yana dhawaṯmaraŋalana ŋanya romŋuru rakunyŋurunydja, liŋgu yakana yurru ŋuriŋi rakunydhinyaramirriyunydja romdhu ŋanya Djesunha ŋayathama yukurra baṯ bitjandja. märi'muyu yäkuyu

²⁵Liŋgu nhumalaŋgala Daypitthunydja yukurrana ḻakaraŋala ŋanya Djesunha ŋäthilinydja, ga dhuwala ŋayi yukurrana ḻakaraŋalanydja gam', ‘Ŋarranydja nhäŋala dharaŋara ŋanya Garraynha, ŋunhi ŋayinydja ŋunhiyinydja bitjanna liŋgu ŋuli ŋarrakala; yakana ŋarra yurru ŋunhi galyundja ŋula nhäyunydja malaŋuyu romdhu, liŋgu dhuwala ŋayi ŋarrakala galki.

²⁶Ŋarraku yukurra ŋayaŋunydja bitjanna liŋguna märr-yiŋgathirrina, galŋa-djulŋithirri yukurra, ga wokthundja ŋarra yurru yukurra nhanŋu, märr-yiŋgathinyarayuna yana dhärukthu. Ŋarranydja dhuwala yolŋu wal'ŋu barrwaṉ, yurru yakana ŋarra yurru barrarirri rakunydhinyarawunydja, yana ŋarra yurru nhina yukurra ŋayaŋu-gatjpu'yunna dhikana wal'ŋu.

²⁷Liŋgu nhe yurru yaka warray gonha'yun ŋarranha ŋunhimalayi rakunymirriwalanydja wäŋalili. Ŋarranydja dhuwala yolŋu nhuŋuway yana, yakana ŋarraku yukurra yurru rumbal ŋorra ŋunhala moluŋura barrwaṉ barrpany'tja.

²⁸Nhenydja ŋarraku yukurra dhunupa yana ḻakarama gatjaḻ ŋunha-bala walŋamirrinydja, ga ŋarranydja yukurra yurru nhina galŋa-djulŋithirrina yanana-wala, goŋmirriyirrina wal'ŋu, liŋgu ŋarranydja yukurra yurru nhina ŋunhalayina nhokalana, bitjan liŋgu yurru.’ Bitjarrayi yukurrana Daypittja waŋana ŋäthilinydja. Ga yolnhana ŋayi yukurrana ŋunhi ḻakaraŋalanydja?... ŋanyapinyay ŋayi?... bay' wiripuŋunha yolŋunha ŋiniya?

²⁹“Ŋarraku gutha walala, ŋarra yukurra nhumalaŋgu dhuwala ḻakaramanydja warraŋulkuma wal'ŋu yana. Ŋunhiyi ŋilimurruŋgu märi'mu Giŋ-Daypit rakunydhina, ga dhalkaraŋalanydja walala ŋanya ŋunhi molulili, ga ŋaraka nhanŋu ŋunhayi ŋorra yukurra mukthun yana moluŋura.

³⁰Ŋayinydja ŋunhi Daypit dhäruk-gänharamirri yolŋunydja Godku yana; ga dharaŋara ŋayi, ŋunhi ŋayi yurru ŋunhiyi dhawu'mirriyanhara yolŋu maḻŋ'thun ŋuliŋuruyi yarraṯaŋuru nhanukala Daypitkalanydja, bala nhinanydja ŋayi yukurra yurru ŋurruŋuna wal'ŋu nhanukala Daypitkala dharapulŋuranydja, liŋgu bitjarrayina ŋayi God dhäruk-nherraṉmina ŋäthilinydja.

³¹Yo, Daypitthu nhäŋalanydja ŋäthili yana dhuwalayi, ŋunhi nhä yurru yalala maḻŋ'thun, bala ŋayi ḻakaraŋala yukurrana ŋäthili yana ŋunhinhayi Christnha, ŋunhi ŋayi yurru walŋathirrinydja ŋulaŋuru moluŋuru, ga bitjarrayina ŋayi ḻakaraŋalanydja Daypitthu. ‘Godthu ŋanya yaka ŋunhiyi gonha'yurrunanydja ŋunhimalayi wäŋalili rakunymirriwalanydja, yaka ŋunhiyi barrwaṉ' nhanŋu barrpa'yinanydja ŋunhili moluŋuranydja.’

³²Yo, dhuwalayi Djesunydja walŋa ŋayi yana, liŋgu Godthunydja ŋanya walŋakuŋala beŋuru moluŋurunydja, ga ŋanapurru ḻundu'mirriŋuyunydja walalay nhäŋala ŋanya walŋathinyaranydja ŋulaŋuru rakunyŋurunydja; bukmakthu ŋanapurru ŋanya nhäŋalanydja, ga dhuwalana ŋanapurru yukurra ḻakaramana yuwalknha wal'ŋu, ga yuwalk ŋayi yana walŋanydja dhuwala.

³³Ga dhäŋuru ŋuliŋuruyinydja ŋunhi ŋayi walŋathina rakunyŋuru, ŋayinydja ŋanya Godthunydja märraŋala djaw'yurruna bala djiwarr'lilina, ga nherraranydja ŋayi ŋanya Godthu nhanukalaynha ŋayi gali'lili wal'ŋu, ga ŋunhana ŋayi nhinanydja yukurra nhanukalana garrwarnha wal'ŋu biyapulnha, manapanna maṉḏa Godnha. Bala ŋayi Bäpa'mirriŋuyunydja Godthunydja wekaŋalana ŋunhiyi Walŋamirri Birrimbirrnydja nhanukala Djesuwalana goŋlili, bitjarra yana liŋgu ŋunhi ŋayi dhawu'mirriyaŋala ŋäthili, ga ŋayinydja ŋunhi Djesuyunydja märraŋala, bala ŋayi rarryurrunana yana ŋunhiyi yulŋunydja ŋilimurruŋgala yolŋu'-yulŋuwalana. Yo, ga dhuwalanydja gay' nhuma yukurra nhäma ga ŋäma ŋanapurruŋgalana, dhuwalayinydja ŋunhiyina Godkuŋuna Garrkuḻuknha Birrimbirr, ŋunhi ŋayina Djesuyuna rarryurruna ŋanapurruŋgala ŋayaŋulili.

³⁴“Ŋunhiyi märi'mu yäku Daypittja, yaka ŋayi ŋunhi marrtjina rumbal wal'ŋu bala djiwarr'lilinydja, yurru waŋanydja ŋayi yukurra bitjan warray dhuwala gam', ‘Gunhuny'tja waŋana ŋarrakalaŋuwalanydja Garraywala bitjarra, “Nhiniyanydja dhiyalana ŋarrakalana gali'ŋura wal'ŋu, dhunupa'ŋuŋurana,

³⁵yana liŋgu ga miriŋunha nhuŋu ŋunhi yurru galkinyamarama warrpam'nha, bala nhe yurru ḻuku-ŋal'yunna yukurra gorrumana ŋunhiliyinydja nhokalayŋuwala ŋurikala miriŋuwalanydja walalaŋgala.’”

³⁶“Nhuma Yitjuralpuyŋu yolŋu walala, bukmak nhuma ŋäka dhuwalayi dhäruktja, ga märr-yuwalkthiya. Yuwalk dhuwala yulŋunydja yana. Djesunydja ŋunha nhina yukurra Godkala gali'ŋura, Garraynha wal'ŋu ŋayi, ga biyapulnha wal'ŋu ŋayi Christnha, Walŋakunharamirrina ŋunhina, liŋgu Gunhu'yunydja ŋanya bitjarrayina nherrara, ŋunhinhayinydja liŋgu Djesunha ŋunhi nhuma ŋanya bumara ŋal'maraŋala dharpaliliyaŋala.”