Acts 2:1-21

¹Tom Pentecost ko day mu tai aratam mu nuna suen la biguwuman ale kuwim suanta te bagaman.

²Se tairatela nirung bo marir aora taiso ko nirung iwita wore duruk wonong te tai kaparam, ale kawam nuna ningi bagawaman mu karogo likilim aram.

³Se nuna mel bo tama kuamili iwita wore parasaram ale suan suan nongote namaram ale nungumik te bagakaso se arikasan.

⁴Se Bur Laili nuna suen la nungumik ago terong ma saparam, ale Bur nunga gi sapawakaso se wonong wonong ko den duap duap te munakakasan.

⁵Juda sang ali sor suen biya ko taiman Jerusalem bagakasan, nuna Kaem bowa ningi bagara ko kariimet.

⁶Se tom nuna nirung mu ikiman mu nuna suen la tai ilu biguwuman ale olekem alo sor suen biya nung nunga den koma koma te munakakasan mu ikikasan.

⁷Nuna ninguru biririkakasan ale makasan, “Kariari imi Galilee kari la,

⁸bare awuk nunguningkiri se nuna ana sor kirker wore nanga den te munakasan se ana ikisan a?” makasan.

⁹“Ana Parthia, Media, Elam kariimet; se Mesopotamia, Judea, Cappadocia, Pontus, se Asia kariimet;

¹⁰se Phrygia se Pamphylia, Egypt, se Libya komasang Cyrene ko; se ana sang mu Rome kari taiman imi te bagasan,

¹¹saki Juda nunga gue te, se sika ali sor kari sang Juda nunga kilek taman mu; se ana sang Crete se Arabia; bare ana suen la nuna Kaem ko ura ningo ningo beteram wore ko dugu duap anananga den koma koma te balsan se ana ikiwasan!” makasan.

¹²Ale ikia ninguru nunga moakaso se nunumi isarukasan ale makasan, “Mel imi ko duap awuk a?” makasan.

¹³Bare sang mu olekem nunga den kolara balukasan ale makasan, “Kariari imi yu waen tawun biya naman,” makasan.

¹⁴Se Peter apostle 11 mu nongorak barasu sanamaram ale kuring biya la kariimet umu nunga manarukaso, “Nanga sikisaki Juda alo, se nina awiriya taiman Jerusalem bagasan, mu nedegawa tagiralko. Ani mel imi ko duap ninga manik se ninguru ikialko.

¹⁵Nina balsan kariari imi yu naman ale ngualaman masan, bare mena. Kariari imi yu me naman. Imi 9 o’clock tumongola pa!

¹⁶Mena, munan imi prophet Joel maingkala ko balam bore; nu iwita ko balam:

¹⁷‘Kaem iwita baluwoso, tom nukum te ani Bur Laili bitirik se kariimet suen la nunga ningi kaparukko, mam. Se ninga namarari se ninga nanawusari mu agiring tamon ale agiring diram la balu pagarmonko. Se ninga kari kulak mu kausa yumura sang arigimonko, se ninga kari garuk mu ipingira arigimonko.

¹⁸Tom mu te aga ura kariimet, kari ta imet ta, mu Bur bitirik se karogo terong mamon ale aninga den balu pagarmonko.

¹⁹Ani mel koma kigilik taiti gomang ko bitirik se aratukko, se ali te mu betelatala kausa duap duap, gue, tama se tama bur biya bitirik se aratukko.

²⁰Worem motam tiromorom paguk, sige motam gue iwita guar mauk, asele Kari Biya ko tom biya, nguangara ago, umutang aratukko.

²¹Se awiriya Kari Biya nup te airuk mu saonga taukko.’