Acts 27:8-38

⁸Ma kampa nuatauai bonabona Crete gerana a naeni aubaina mara i apoapoe ma a ḡeta dobu e ḡoreḡorei U Aiaina, Lasea taon au ḡereḡerena.

⁹Mara ḡaeḡaena a vine-boai au vaḡai ma Rupena Ujina marana boiboḡi i kwa, marina lamna ive ma rabama ai mara ma boga babarana i vinirovorovo.

¹⁰Ma Paul i riwa, “Nelara, malana a vaivaia da ata vaḡai ina apoapoe kaua ma waga ma purapura tana vine-boa-pai. Ata lawana maiteni tana vineboai.”

¹¹Wate sorodia ai bada, kapena ana babani i rautaniḡanei ma eḡa Paul da kampa ata mae ma eḡa ata nae.

¹²Wei gabuna eḡa ita ai wei ivena au marana ma rava maḡamaḡaui i goei da waganei ata nae da Phinix una, Crete au bonabonana da kampa ata mae da bodu ita kwa. Wei u ḡaeḡaena ma mutuii lavarata ma rauanaḡa e vinao-vereverei, da au mulaḡina e mamae.

¹³Maranai rauanaḡa i vikarei ma waga ravai i notai da marina mara aiaina da ita nae au Phinix una. Ma anika i taini ma Crete bonabona geraei i nae.

¹⁴Ma eḡa barana ita uama ma kojikojira olei iveiai.

¹⁵Ive wagana i verau-matamatani ma waga eḡa tagotagogina da ita vobelei ma i voterei da ive waga i avara-opunei.

¹⁶Bonabona aburuna Kauda gerana au mulaḡina a ruba ma kampa a voia guratana da dingy a terepai au waga da a ragita-jijini.

¹⁷Wei i kauana vorovei ma ḡuravei waga au gabaurina da waga adana i raḡita-kwaviviroi. Taui i rovo mepa da au maratete ina amḡaena au Syrtis, Libya au gerana. Lamna aubaina ḡuravei ai da kuka, i raḡita-tagogiei ma au boga i viorereni da waga ita bibi. Ma i voterei da kojikojira waga i avara-naiei.

¹⁸Maratomna kojikojirana i rarau-guratanelei da purapura ḡelaui au boga a viorereni.

¹⁹Aupom vitonuina taui waga purapurai i viorereni au boga.

²⁰Kojikojira i ruba da aupom biaḡa da madeḡa ma ubona i purui. Ravai ai nota i kwa.

²¹Wei au marana rava au waga am i kauana-avei, anina ma Paul i vomairi ma taui i riwei, “Nelara ota rautaniḡaneu ma Crete eḡa tata oputawanei, amapo waga eḡa tata viapoapoeni ma ata purapura eḡa tata vineboai.

²²Wate a ririwana-guratemi da eḡa orami ina peu! Aubaina avena da waga ina monu wate eḡa ina iraḡe.

²³God lamna tau au Bada ma ana taunola tau. Waguvarai God ana anela i paritawaneiai awariu.

²⁴Ma i riwa, ‘Eḡa ma rovo! Tam anina da Caesar au naona ma etara! Ma ḡelauna lamna God ana nuavaina maemaena rava anatapui maiteni e vaḡavaḡai ina lawana.’

²⁵Lamna aubaina tepami ina tora! Aubaina tau God a vivitumaḡanei ma menanare i ririweia nanarena ina tupua.

²⁶Wate tauta au maratete tana amḡaena.”

²⁷Kojikojira i avara-naielai au Mediteranean Bogana da aupom 14 i kwa ma nubautuva waga ravai malana i vaia da taui gera i tuḡereḡerei.

²⁸Ma barawa au giana ḡaima i raḡini ma au boga i tawanana-ḡairei da topa ana gabinou ita aramanei. Ma i aramanei da 40 meter ma i mae aburuna ma i raudadana-melei lamna marina 30 meter.

²⁹Ma taui i rovo mepa da rabama waga au kira ina viairikarikai lamna aubaina waga au ipuna anika 4 i tawana ḡairei ma i vipaipai da mara ina tom tawanana.

³⁰Ma waga ravai ai kaua i kaukauei da ita ruba-govaḡa. Ma i vioga da dingiei ita opu waga au naona da anika ita dubara-naiei, ma lamna aubaina dingy i teretere-ḡairei au boga,

³¹Wate Paul sorodia ai bada maiteni i riwei, “Mepa da waga ravai ina rubatawanemi lamna anatapumi ona iraḡe.”

³²Ma sorodia dingy ḡuravana i borituini ma dingy kwakwavina i peu au boga ma i avara-naiei.

³³Ma maratomtomai Paul rava anatapui i egari da ita am, i pa, “Taumi marina aupom 14 rovo i kauemi ma eḡa ota am.”

³⁴“Tau a vivibaḡa-guratemi da ona am da ona virewapana, eḡa aiai tagogi ina iraḡe.”

³⁵Paul i babani vorovei ma au matai palawa i vaia, Bada i viegualauei ma i vogimai ma i ani.

³⁶Ma rava anatapui inanai ma orai i bagibagi ma am i vikarei.

³⁷Tauai anatapuiai 276 au waga.

³⁸Ma rava anatapui i am da i am-iaua. Ma witi baikei au boga i viorereni da waga ita votelatelai da au gera ita ḡota da avena ita amḡaina.