Acts 27:8-38

⁸Mu ug warod i yan ni gamad ba chugur nga dap’e l’ay, ma gamad athamgil ngabangi ban’en ni kanog yu “Dubchol ni Bfel’” ngay, nde mal’af ko binaw nu Lasea.

⁹Ma gamad par u rom nib n’uw nap’an, nge yan i mada’ ko ngiyal’ nike wogwog ni nggu warod, ya ke ma’ Yaran e Bayul, ni aram e ke tabab ngal’an ni nge gel e day. Me pi’ Paul e re fonow ni ba’aray ngorad ni ga’ar:

¹⁰“Pi cha’, kug guy nre milekag rodad ney u roy i yan ngam’on e bay e wogwog riy; ya ba gel e mogoth nra tay e chugum nge barkow ma ku errogon e girdi’ nra yim’.”

¹¹Machane fa’anem nib tolang ko salthaw e ke pagan’ ko tin nike yog gabitey nge en ni ir e suwon e barkow, ma de pagan’ ko tin nike yog Paul.

¹²Ya re dubchol nem e gathi reb e dubchol ni bfel’ ni ngan par riy u ngal’an e garbeb; ere oren e girdi’ e yad ba’adag ni nge yan e barkow nga ni guy rogon ngan thap nga Fenix, ni fa’anra yag; ni reb e dubchol ni bay u lan yu Krete nib pig ngalan e yimuch ni ngal nge ngalan e lel’och ni ngal, ya rayag ni ngar pired u rom u ngal’an e garbeb.

¹³Me yib e nifeng u lan e yimuch nib waer, me finey fapi pumo’on nrayag ni nga ni yan ni bod rogon ni kar leam niged; ma aram miyad girengiy e angkar ngalang me yan fare barkow ni kan chugurnag nga dap’e l’ay u Krete nrogon nrayag.

¹⁴Machane de n’uw nap’an me yib e nifeng nrib gel u daken fare donguch — ni fare nifeng nike lunguy e nifingin e lel’och ni ngek — ni be thow u daken e binaw.

¹⁵Me aw ko barkow, ma dabiyag ni ngan cheleg e barkow nge sap ko gin ni be yib e nifeng riy, ma da kug athamgilgad ma gamad pag nge un ko nifeng.

¹⁶Ma gamad ling boch ko nifeng ko ngiyal’ ni gu warod u maday u ba’ ni yimuch ko donguch nu Kauda. Ireram e gin ni gu athamgiliyed riy nggu m’aged gafan e bowoch ko barkow nge par nike muduwgil.

¹⁷Miyad fek fare bowoch nga daken e barkow, nge mu’ miyad yin’ boch e tal u baraba’ e barkow ngan fek u t’ay e barkow nge yan nga baraba’, nge mu’ min longobiy nga downgin e barkow nga ni m’ag ni kan chichiiy. Ma kar rusgad nrichey me ser e barkow rorad ko yan’ nib thay nga orel u dap’e l’ay u Libya; ma aram miyad pilig e lay nga but’ miyad pag fare barkow ngi i fek e nifeng i yan.

¹⁸Me cham e nifeng nib gel i yan, me yan i reb e rran riy miyad tabab i yin’ e chugum ni bay u barkow nga maday.

¹⁹Miki yan i reb e rran riy miyad yin’ e talin e maruwel nu barkow nga maday ni ron’ed nga pa’rad.

²⁰Bo’or e rran nda gguyed e yal’ ara t’uf u lanelang, ma kayigi par e nifeng nri kab gel. Munmun ma da kug leam niged ni ka gamad ra fos.

²¹Ma nga tomuren nike n’uw i n’uw nap’an nda ni kay e ggan me sak’iy Paul ngam’on rorad me ga’ar ngorad, “Fa’an mang e mu folgad ko thin ni gog nge siy i chuw e barkow u Krete, ma dabiyag ni nge kireb e barkow ni aray gelngin ma dab nn’ag e chugum nu barkow.

²²Machane chiney e gu be wenig ngomed ni ngam athamgilgad! Ya dariy ta’a bigimed nra yim’; kemus nre barkow ney e ir e bayi kireb.

²³Ya fowngan e Got ni gag girdi’en me ir e gu ma meybil ma gu ma liyor ngak e yib ba engel rok ngog

²⁴me ga’ar, ‘Paul, dab mu rus! Ya thingar mman mu sak’iy nga p’eowchen e en ni Emperor nu Roma; ya Got ni bfel’ laniyan’ e ke pi’ e pogofan rok e pi cha’ney ni yad gubin ngom ndab ra m’ad, ni pi girdi’ ney ni gimed be yan u barkow.’

²⁵Ere mu athamgilgad! Ya ba pagan’ug ngak Got ni bay yan i aw ni bod rogon ni kanog ngog.

²⁶Machane bayi seregdad e nifeng nga reb e donguch.”

²⁷Ke yan i gaman ragag nge aningeg e neap’, ni be fekmad e nifeng nib gel u lan e day ni Mediterranean. Ma gonap’an e ke lukngun e neap’ me sana e sala nu barkow ngay ni kug chugurgad ko binaw.

²⁸Ma aram miyad yin’ e gaf nga maday ni ka ni m’ag ban’en nib tomal ngay miyad pir’eg ni ra’ay nge rliw’ e fit tom’arngin e gin’em; me ta’aboch miyad rin’ ni aram rogon miyad pir’eg ni mereb i ragag e fit tom’arngin.

²⁹Ma kar rusgad ya be lungurad e bay yan e barkow romad nga daken e malang u maday, miyad pag aningeg e angkar u p’ebuk’ e barkow nga but’ miyad yibil ni manga yigi papey nge rran.

³⁰Me guy rogon e sala nu barkow ni ngar milgad u barkow; miyad nguchuruy fare bowoch nga daken e day, ni yad be dake ngranod ron’ed boch e angkar u mit e barkow nga maday.

³¹Machane me ga’ar Paul ngak fare pilungen e salthaw nge fapi salthaw, “Fa’anra dabi par e pi sala ney u daken e barkow, ma dabiyag ni gimed ra fos.”

³²Ma aram me th’ab fapi salthaw fapi rop ni ir e be kol fare bowoch miyad pag nge yan.

³³Ma aram e ke chugur ni nge rran, me wenig Paul ngorad ni yad gubin ni nge bagayad me kay ban’en ni ga’ar, “Araye nga ragag nge aningeg e rran ni gimed be son, mu lan e re ngiyal’ i n’em ke mada’ ko chiney e dawor mu ked ban’en.

³⁴Ere wenig ngomed mu abichgad nge siy kum m’ad; ya mus nga ba gaf i piy u lolugen bigimed ma dabi thay.”

³⁵Nap’an ni mu’ Paul i yog e re bugithin ney, me fek boch e flowa, me pining e magaer riy ngak Got u p’eowcherad ni yad gubin, me t’ar nge kay.

³⁶Miyad athamgil, ma yad gubin nra bagayad me kay boch e ggan.

³⁷Ma gamad l’agruw mir’ay nge medlip i ragag nge nel’ u daken e barkow.

³⁸Ma fa’ani mu’ gubin e girdi’ ko abich, miyad yin’ wom’ngin e woldug ni yima ngongliy e flowa riy u barkow nga maday ni nge baud e barkow.