Acts 26:15-32

¹⁵Ma a paridadana, “Bada tam aiai?” Ma Bada i paribelei, “Tau Iesu, ravana tauna e viviḡaviei.

¹⁶Wate ma vomairi. Tau a nei awarim da vaivai ata verem da ma vitaunola Tau aubaiu, ma amadodo aiwai u inanai ma aiwai ana viatataiem, ma vimatamatei rava awarii.

¹⁷Tau ana gagaloem am rava mai Israel awarii ma nanare Jentail ravai awari, ma ana paritawanem Jentail awarii,

¹⁸da matai ma vikalai, da ai lawana apoapoe ina voterei ma ina nei au lalalaina, ma Satan ana rewapana ina votere-tawanei ma ina nei God awarina. Tauna ai ḡoʼapoapoe ina nota-tawanei, ma ina taravaini natunatuna rarautanii, ai tumaḡana awariu aubaina.”

¹⁹Lamna aubaina Gulau Agrippa, tau riwa marei au inana a inanai a voteletelei.

²⁰Au naona a jima mai Jew awarii au Damaskas ma nanare au Jerusalem ma Judea anatapuna ma muriai Jentail maiteni awarii. A jima da ai ḡoʼapoapoe ina votere-tawanei ma ina mae-tavirei God awarina, ma ai lawana ina vimataira da ai kaua apoapoe i voterei-tawanei.

²¹Wei babanii aubaina mai Jew au Tempol i vojijiniu ma i ḡoei da ita viraḡeniu.

²²Wate God i vilawaniu da marina, ma weka a maimairi da a vimatamata rava muomuoi ma nanare rava ḡaeḡaei awarii. Aiwai a bababaniei lamna peroveta nununai ma Moses i ririweta ina tupua.

²³Taui i riwa da tauvilawana Keriso ina vinuapoapoe. Ma tauna ina iraḡe ma ina vinao da ina vomairi me ma wei matairana ina vinolanola da tauna God lalalaina mai Jew ma Jentail aubaii.

²⁴Weka Festus i vionaḡi ma i garara Paul awarina, “Tam u bua! Am aramana i vibuaim!”

²⁵Wate Paul i paribelei, “Au bada Festus tau eḡa ata bua. Tau aiwai a bababaniei lamna riwa kaua ma babani anona.

²⁶Wei kaua eḡa govagovaḡana ma aramanei da Gulau Agrippa anatapuna i aramanei, ma lamna aubaina ana tepatorau wei kauai ana babaniei awarina.”

²⁷Paul Gulau Agrippa i riwei i pa, “Peroveta e vivitumaḡanei bo eḡa? A aramanei da nanare!”

²⁸Ma Agrippa i paribelei, “U notai da tau laḡilaḡina ma sinaviraiu da ana vikerisiana!”

²⁹Paul i paribelei, “Laḡilaḡina bo amapo, a raraupari God awarina da tam ma rava anatapui wei au boruna ina tupua-vira me tau nanare wate eḡa sein maiteni.”

³⁰Anina ma gulau ma gavena ma Benisi i vomairi ma i nae.

³¹Ma anatapui i nenae ma i babani vivira ma i vianina i pa, “Wei ravana eḡa aiwai apoapoena ita kauei da tana viraḡeni bo tana pani.”

³²Ma Agrippa Festus i riwei, “Mepa da eḡa ita vibaḡa ḡae Caesar awarina, lamna marina tata rupeni.”