15Arrantherr Sanhedrin Council-warl-then ahelengkw atyetyart ingwer-warl angka thwenetyek, Paul arrekantherr-warl atnwenhey-alhetyek, atyetyartel-anem Paul renh arraty-angkwarr ayernetyek. Rernem renh nhewarl-anyem atnwenhey-alenty, anwantherr renh ipmek-anem irrtyert-atwem.”
16Paul-kenh ampelikw awek rernemarl ikwerarl tyel-angkerrenh, renh ipmek atwetyek. Ranem Atyetyart-rnem warl-warl aylpemel, Paul ikwer ilek.
17Paul ranem atyetyart anyentek yangkelhek, renh ilek, “Anthety nhenh atnwenha, atyetyart irlkentyek-artwey Claudius ilkwewarl ra iletyek.”
18Atyetyart ra anthety renh atnwenhek, ratherr angkerretyek. Ra atyetyart irlkentyek-artwey renh ilek, “Paul-el artwa anthety nhenh thwenek, atyeng-angkwarr, renharl Paul-el thwenek.”
19Ranem anthety renh anyelkel ayernek, “Ilek ntwa atyeng iletyek nga apetyek?”
20Anthety ra atyetyart ilkwa renh ilek, “Jew-rnem angkerrenh, Paul renh ipmek atwetyek. Rernem-anem ingwepenh angka ngkweng-warl thweneyenh. Ntwa Paul renh Sanhedrin Council-warl atnwenhetyek, rernem renh arraty-angkwarr ayernetyek.
21Nga ikwer-rnem awelhey-angenh anetyek. Aray, artwa 40 irlkenty ikwer mpwelheyel, renh ipmek irrtyert atwetyek. Artwa rernem angkerrenh arlkwey-angenh antywey-angenh anetyek, Paul rernem atwenty-penhelant arlkwetyek, antywetyek. Rernem lyert mpwelheyel angka ngkwenh awetyek.”
22Atyetyart irlkentyek-artwey ranem anthety renh ilek, “Angka nhenh ntwa atyeng ilek, nthakenh ingwer-rnem iley-angenh.” Ranem anthety renh thwenek.
23Atyetyart ranem atyetyart atherrek yangkelhek. Ra renh-atherr ilek, “Mpwelanth arrpemarl atnengkilem, ahelengkw atyetyart 70 nanth-akert-rnem 200 ingwer-rnem irrtyart-awarr-rnem-then, ahelengkw 200 ingwer-rnem-then, nayp arreylp-awarr-rnem-then. Mpwelanth Atyetyart-rnem Caesarea tawen-warl alhetyek.
24Ikwer-penhan Paul nanth-warl tywenemel renh atyetyart nhernem-angkwarr Felix-warl alhetyek, atyetyart ilkwewarl.”
25Atyetyart ranem pip renh ingkwernek, ratherr Felix renh anthetyek.
26“Felix-ay, atha ngenh tnakem. Ayengan Claudius, athan pip ngkweng ingkwerneyel.
27Jew-rnemel artwa nhenh renh anterrkwek. Rernem renh ipmek atwetyek irrek. Atha awek ra Rome-areny aneyel. Alakenh-anyem ayeng atyetyart-rnemek arrkngert angkek, renh itethilemel.
28Athanem renh Sanhedrin Council-warl atnwenhek, renh-rnem ayernetyek, ‘Ilek-they arrantherr artwa nhenh ipmek atwetyek ilkelheyel?’
29Ayeng akalty, atharl renh-rnem awekarl, rernemarl ikwer angkerrenh ipmek atwetyek, tyayl-warl akwernetyek. Artwa ran arlarl.
30Atha awek arrpemarl rernem ipmek atwetyekarl angkerrenh. Alakenh-anyem atha renh ngkweng-warl thwenek. Athantey arrpemarl Jew-rnem Atyetyart-rnem-then rernem ngkweng-warl alhetyek, rernem ngkweng-itwek-anem anngetherr ayntarrp-ilemel iletyek.”
31Ahelengkw-rnem awelhek. Ingwel Paul rernem Antipatris tawen-warl akngek.
32Ingwepenh ingkel apetyek-rnem rernem Jerusalem-warl-anem alpek. Ahelengkw nanth-akert-rnemel Paul renh anper-antey akngek Caesarea tawen-warl
Acts 23
Acts 23:15-32