Acts 21:11-35

¹¹I botu kurikai ba Paul kana kikiru i yauni ba ikesina kaekaena ba nimanimana i kauta, ba i wona, “Kanuma Kaobaisiyena i wona, ‘Niko kikiru badana Jew biyisi Jerusalem kamonai, nikasike sina kausi ba Gentile biyisi ku yarosi sina terei.’”

¹²Nikona ka nonori wai yakai ba pipiya mutusi, Paul kai baba tupetupeni kata, kega ita nae ku Jerusalem.

¹³Saba i kaobeyana, i wona, “Awaika kairavina ko tutou, ba nuwanuwaku ko kasikasigudai? A bobunaga kata kega kau patupatumiku wata saba, yebo Bada Iesu kana waba kairavina, Jerusalem kamonai ana rabobo.”

¹⁴Ba kai gesena kabakabai wai ka boterei ba ka wona, “Bada ana wainai nikona ina tupuwa.”

¹⁵Nikona murinai ka bobunaga ba ka nae ku Jerusalem.

¹⁶Caesarea bigeruwana biyisi mutusi si urabaikai Manson ana ku yove, namai kata mana. Kona wai Cyprus sebare ba bigeruwana biyina wadubona kesana.

¹⁷Ba maranai ku Jerusalem ka verakasibau, wai bigeruwana biyisi nuwagaire yai si vera beyikai.

¹⁸Mara i tom wai Paul ba mutukai ka nae James kata kitai, wai taparoro babadisi nai si mamana.

¹⁹Paul i kaikaivisi ba awaika ereonowana God Gentile biyisi kamosi yai i wosei wai kurisi i mamatarei.

²⁰Maranai nikona si nonori wai, God si bokabakabari. Damanina ba Paul kurina si wona, “Waresikai, ke kinani Jew biyisi koroto wawasi si geruwana, ba Moses ana kairuwana ere maragasisi te kibikibi.

²¹Si kwaruma si wona, kata ku wona, ‘Jew biyisi ereonowasi Gentile kamosi yai te mamana wai kega Moses ana kairuwana sina kibi. Te wonewonisi kega natunatusi sinisi sina bonai kona ata dudura sini saununuri.’

²²Awaika kana wosei? Sina kuiri kata ku botu,

²³wai awaika kana wonim wai ke wosei. Jew sebasebare asi bata nina kota kamoti yai si kaobiyoyobana God kurina.

²⁴Nikosi sebasebare ke urabaisi yabata ko nae God ana ku yove, kona bobunaga meyimi God matanai ba mane ai ko suwara kata kaobiyoyobana kona yaragi, ba koni gariba wai kona ini beyena, kata kaobiyoyobana si kakabi. Maranai pipiya kona sina kitai wai pipiya ereonowana sina kuiri kata Moses ana kairuwana ke kibikibi ba awaika goyona te bisisiyei wai kega bisuwona.

²⁵Gentile bigeruwana biyisi kairavisi wai, ama nota pepai ka kirumi ba kai porai i nae kurisi. Kata puyobunuwa kamsi ba tarasi, ba abapayapayaya sini kima bunuwana wai, kega sina kam, ba kega sini kaokaowana, kona sina rukaipara.”

²⁶Mara i tom wai Paul sebasebaresi i urabaisi ba kosi yabata i gairena meyisi, ba sinae God ana ku yove ba priest si wonei, bigairena God matanai meyana sini kakabi, wai yebo kesakesasike asi puyobunuwa sita wosei.

²⁷Matapa kao 7 bobokoboina marana. Ba Asia Jew biyisi mutusi kega Keresiyana Paul, God ana yove kamonai si kinani, wai koroto si yagisigisisi,

²⁸kata si rausi ba si paraparara, “Israel biyimi, koi basikai! Niko sebare kupura ereonowana ata pipiya e bibeyebeyesi kata Moses ana kairuwana kega sina bosisiri, ba yebo Greek biyisi i urabaisi si riu God ana ku yove ba God ana yove si pudapudai.”

²⁹(Nikona si sisiyei kairavina, Trophimus wai Gentile biyina Ephesus biyina Paul yabata meyaga kaikaponai si kinani ba si nosi kata Paul i urabai si riu God ana ku yove.)

³⁰Meyaga kaikapona tupana i gusui ba reso kaikapona i tupuwa, wai pipiya ereonowasi si vera si botu Paul si botawani ba, God ana yove yai si taina kasibauwei ba mara kesana, God ana yove matam ketasi si rugudu.

³¹Ba kasibunuina si bibagei, wai Rome abiabiyisi asi bada wara i nonori kata reso, kaikapona Jerusalem kamonai i tuputupuwa.

³²Kata yagiyagina wata abiya badana ana abiabiyisi yabata si vera si gakira koroto ku kamona. Maranai pipiya si kinanisi wai Paul gudaina si boterei.

³³Abiya badana i gae ba i patumi ba chain ruwamo ai si kausi. Ba i toiruba kata, kona kotoi ba awaika i wosei.

³⁴Koroto kamonai, pipiya mutusi sisiya kesana kairavina si parapara, ba yebo mutusi wai sisiya baunai, maranai abiya badana binuwamotom ba binuwa kairagaraga kamonai irakata, wai kega sisiya damana i panani, wai i kaobiyoyobanisi kata Paul sita naveyei abiabiyisi asi ku yove.

³⁵Ba maranai Paul yove matam ketanai ibo tete gae, wai reso i rakata saki kona kairavina abiabiyisi si kabari momei.