Acts 21:1-27

¹Ephesus kerisiana babadai a viegualauei ma wagei jijimanina a nae au Cous bonabonana ma ubaubanai a nae au Roudes bonabonana, kampa da a damana au Patara taon.

²Weka waga ḡelauna i nenae au Phonisia a gerui,

³da au Saipras bonabonana a rubatawanei, au kelakelauai da a nae au Taia au Syria provins a ḡota, da purapura ita viopuni.

⁴Kampa tauvitumaḡana a baiei ma aupom 7 maiteni a mae. Arua Vivivireina kerisiana i riwei da Paul awarina aiwai ina tupua, ma lamna aubaina Paul i viḡaei da eḡa ina nae au Jerusalem.

⁵Ma mara i ḡetai da ata vomairi, kerisiana awawai maiteni da natunatui taon i voterei ma anatapuiai a ḡaira au gera, a raupari gogona.

⁶A viegualau da tauai au waga a geru ma taui i nae-me ai au numa.

⁷Au Taia ma a nae au Tolemais taon a ḡeta. Tauvitumaḡana kampa a nebelei ma aupom tagogi maiteni a mae.

⁸Ma marana i tom ma dobuna a voterei ma a nae au Caesarea, kampa God riwana taujimeina Philip ana au numa a mae, tauna oroto vi-7-na au Jerusalem i vinevinei da lam taupainina.

⁹Tauna natunatuna waivinei 4 eḡa tavitavinei, taui God ana riwa i vivieḡai rava awari.

¹⁰Aupom vomaḡaui i kwa, kerisiana wavana Agabas, tauna nanare God riwana i vivieḡai, Judeaei i ḡairai au Caesarea.

¹¹Ma i nei awariai da Paul ana tairoro i vaia ma tauna urana ma aena i raḡina-melei ma i riwa i pa, “Arua Vivivireina e ririwa, da Jew babadai wei tairorona taniwagana wenanare ina raḡini, ma Jentail au urai ina terei.”

¹²Maranai wei riwana a nonori, tauai kerisiana ḡelaui maiteni Paul a vibaḡana-guratei, da avena ita nae au Jerusalem.

¹³Wate i pa, “Aiwai aubaina o vivitouana ma orau o viviapoapoeni! Tau a vokaukaua nonoa da ina raḡiniu, wate eḡa lamna ava ma ina viraḡeniu au Jerusalem, Bada Iesu a vovotaḡotaḡoi aubaina.”

¹⁴Tauai a viviḡaei ma eḡa tagotagogina da nuanuana ata sinavirai lamna aubaina riwanana a voterei ma a riwa a pa, “Bada ana ḡoanei nanare ina tupua.”

¹⁵Wei au murina a vokaukaua ma a vomairi au Jerusalem.

¹⁶Kerisiana ḡelaui mai Caesarea I naielai Nason ana au numa ma kampa a mae. Tauna oroto Saiprasiei, ma Iesu votaḡona i vikareni maranaina rava vouvounai i vikarei da Iesu Riwana Aiaina i rarau-gugulei.

¹⁷Maranai au Jerusalem a ḡeta kerisiana ana nuaiaii i nebelelai.

¹⁸Maratom ḡela Paul maiteni a nae da James a raugenari, dogadogara anatapui kampa.

¹⁹Paul taui i viegualauei ma ana au vaḡai God aiwai i kaukauei Jentail awari anatapuna taui i pariverei.

²⁰Maranaina wei riwai i nonori, taui God i voepaepai ma Paul i riwa i pa, “Turaiai u aramanei mai Jew ai maḡa tausan nanare weka Iesu e vivitumaḡanei, ma God ana tarawatu e vovotaḡo-kauei.

²¹Wate rava Jew kerisiana weka au Jerusalem am kaua i vibenabenaei, da tam Jew Jentail maiteni e mamae e viararamani da Moses ana tarawatu ina gedugeduaiei. Ma u riwei da natunatui ini eḡa ina bori ma ai kaua ḡelaui eḡa ina votaḡotaḡoi.

²²Taui i aramanei da tam u ḡetai, Marina aiwai tana kauei?

²³Aiwai a ririwemi ona kauei. Au nelara 4, taui parivainuaḡana bagibagina God awarina i kauei.

²⁴Ma taravaini ma ona nae au Tempol ma ona viaiaina-melemi ma ma vimaia da taui ai viaiaina pulona ina kauei. Anina ma taui kolai ina ḡari ma rava anatapui ina aramanei da tam Moses ana tarawatu anina e vovotaḡotaḡoi, ma babani au naona lamna anatapuna moru kaua.

²⁵Ma Jentail marina i vivitumaḡana aubaii pepa a girumi ma wenanare a riwei, sia e pulopuloei kokoitau awarii eḡa ina ani, Tara eḡa ina umai, Rava ḡamoḡamo uai e kikiki tarai eḡa ita toi-tawanana, eḡa ona ani. Eḡa ona viawawana labalababa.”

²⁶Anina ma marana i tom Paul nai nelarai 4 maiteni i viaina-melei God au matana. Muriai Paul i rui Tempol au orana ma i vinolanola pirisi awarii da mara aiwai taui ai viaiaina ina voterei. Ma maranaina pulo ita terei taui tagotagogi ava aubai.

²⁷Ma aupom 7 aburuna ava da ita kwa ma Jew ḡelaui au Eisia provins maemae taui Paul i ʼnanai Tempol au orana. Au naonei taui Paul i ʼnanai oroto Ephesusei wavana Trophimus maiteni, au taon i bababara ma i notai da tauna Trophimus i ruiei Tempol au orana. Taui Paul i vojijini ma i garara i pa, “Nelara mai Israel ona nei, ona voaguiai! Wei orotona dobu anatapuna e nenaeni ma rava anatapui e viviararamani da mai Jew ma ata tarawatu ma Tempol i parivirevirei. Tauna Jentail i neiai gabuna au vivivireina ma i tuvaidoedoei God au matana!”