Acts 20:15-38

¹⁵Mara i tom wai ka kuka ku Kios neyarina ka vera tawani, ba kao kesana murinai kai garubona ku Samos neyarina, ba yebo kao kesana murinai ka verakasibau ku Miletus.

¹⁶Paul ana waina Ephesus ita vera tawani, kairavina kega ana waina kona kupurinai iti metewa. I biyagiyagina ku Jerusalem ita verakasibau, ba muri yai Pentecost marana.

¹⁷Ka verakasibau ku Miletus wai Paul wara i porai Ephesus taparoro babadisi sita botu kurina.

¹⁸Si verakasibau wai i wonisi, “Woraworanai a botu ku Asia kupurina, ba mekabage kamonai ta mana i botu karaku nina wai ko kuiri.

¹⁹A tere kirena meyiku ba ere mata okowiku, Bada ana saibira a wosei ba ruruba kaikapona, Jew biyisi karisi yai a yauni.

²⁰Ko kuiri kata rumamarai ai beyebeyimi, ba kega awaika kesana a botawani. Awaika iti baisim wai debai, ba ami yove yai awonimi.

²¹Matapa awonimi kata, Jew ba Greek biyimi God kurina kona tombaubaunimi, ba Iesu koni geruwei.

²²Ba karaku, Kanuma Kaobaisiyena i kaotuneiku a nenae ku Jerusalem, kega a kuiri awaika ina tupuwa kuriku.

²³A kuiri kata meyaga ereonowasi yai Kanuma Kaobaisiyena, i kaobinonoriku kata patuma yovena ba paiwara e potapotaiku.

²⁴Saba au yawasa kuriku wai kega sawara kaimasawina, saba Bada Iesu ana saibira i tauniku wai ani kakabi, wai kona wata a baibaiyavi. Pipiya kurisi God ana baibaitai, warana gairena ata rumamarei.

²⁵Karaku a kuiri kata komi iyabomi God ana basileiya kurimi a rumamarei, wai kega kona kinana meyiku.

²⁶Kona kairavina karaku a wonewonimi kata kotoi wata ina siwana, wai kega kunumakina ana kabari.

²⁷God ana waina ereonowana a rumamarei kurimi, kega kesana a botawani.

²⁸Ko pota meyimi! Komi ba God ana dam Kanuma Kaobaisiyena i berimi wai, God ana ekaleisiya taranai i gimonisi wai ko pota kabitamnisi.

²⁹Ani sumarimi murinai a kuiri kata, pipiya kukou garagara rutaininisi sina riu ku kamomi, wai kega sini nuwanuwanimi.

³⁰Pipiya yebo kamomi yai sina bomsiri sini sisiya kwarukwaruma, ba nonorayauna kosi sina kibisi.

³¹Kona kairavina niko bibeyebeyena goyonai, ko papara kabitamnimi! Awaika bodu tonu kamonai kao ba pom a paiwara, ba ere mata okowiku ai beyebeyim ba kega a boterimi.

³²Ba karaku God ku yarona ba ana baibaita ba ana gairena, wonana kamonai a teretereimi kata ina bobi maragasimi, ami buderi pipiya kaobaisiyesi kamosi yai.

³³Kega kotoi kesana ana silver kona gold kona kana gara a kita kirorowei.

³⁴Komi ko kuiri kata nikosi yaroyaroku ai, a pota meyiku ba yebo wagawaga turaturaku a potaisi.

³⁵Awaika ereonowana a wosei wai ai beyimi kata poyapoyami, yai pipiya kaikayokayosi koni baisisi. Bada wonana kona nosi, kega nuwanuwami sina wapa, ‘Kona berena wai, nuwagairena i rakata saki, kega bage kuna bosekwa.’”

³⁶I sisiya i kakaba, wai si maere sogasoga ba i rupari.

³⁷Ba ere tutousi si tararausi si boyoyaoni ba si kiuruwei.

³⁸Si yapoya saburere kairavina i wona, “Kega muri yai kona kinana meyiku.” Ba yabata si nae ku waka.