Acts 20:1-28

¹Binuwamotom ba reso i kakaba wai, Paul bigeruwana biyisi i runotuwanisi ba ibo bimaragasisi, ba i kiuruwisi. Ba i nae ku Macedonia kupurina.

²Kona kupurinai i bowagawaga ba bigeruwana biyisi i kaobimaragasisi yepo i verakasibau ku Greece kupurina,

³ba namai i mana yepo nawaravi tonu si kakaba. Ba i bobunaga wakai ita nae ku Syria kupurina saba, ibo panani kata Jew biyisi sibi dugu kasibunuina kairavina wai i yewo i veramaga ku Macedonia kupurina, ba namai wata ita nae ku Syria mena.

⁴Pipiya mutusi yabata Pyrrhus, Berea biyina, kona wai Sopater natuna, Aristarchus ba Secundus kosi Thessalonica biyisi, Gaius kona Derbe biyina, ba Tychicus ba Trophimus kosi Asia biyisi, ba yebo Timothy yabata.

⁵Nikosi sebasebare si nao si nae ku Troas ba namai si potapotai kai.

⁶Bread Kega Yeast Yabata Poragina murinai wai, Philippi ai wakai ka geru ba kao 5 murinai Troas yai kai kesanikai ba namai yebo kao 7 ka mana.

⁷Taparoro dagudagunai, rabisi pompom ai ka notuwa, kambira kairavina ba kona wai Sunday. Paul pipiya kurisi i sisiya yepo i pom basuna, kairavina mara ita tom wai iti sumarisi ita nae.

⁸Kai kesanikai kabi dugu ba yove kamona tepanai wai yasegana pesarisi si karakarata.

⁹Yaraka kana waba Eutychus batara bitonuinai kaidamonai, damana sibe kana ba riuriu i ma potai ba matana i duduna wai, i kenouwapa ba i peku ku tano. Si gakira wai raborabona si kabari.

¹⁰Paul i gakira i runoma ba i tararausisi ba i wonisi, “Kega nuwanuwami sina kairagaraga, kona wai yawayawasina.”

¹¹Paul i veramaga i gae ku yove kamona, ba si kambira ba si kam yabata, ba kurisi i bisisiya yepo mara i tom wai i sumarisi.

¹²Ba pipiya ere nuwagairesi sebare yarakina yawayawasina si urabai si nae ku yove.

¹³Ba wakai kai nao ka nae ku Assos, namai Paul kati uwani. Kairavina ana waina kae tano ai wata ita yewo.

¹⁴Ba Assos yai i pananikai wai, kai uwana ba ka nae ku Mitylene.

¹⁵Mara i tom wai ka kuka ku Kios neyarina ka vera tawani, ba kao kesana murinai kai garubona ku Samos neyarina, ba yebo kao kesana murinai ka verakasibau ku Miletus.

¹⁶Paul ana waina Ephesus ita vera tawani, kairavina kega ana waina kona kupurinai iti metewa. I biyagiyagina ku Jerusalem ita verakasibau, ba muri yai Pentecost marana.

¹⁷Ka verakasibau ku Miletus wai Paul wara i porai Ephesus taparoro babadisi sita botu kurina.

¹⁸Si verakasibau wai i wonisi, “Woraworanai a botu ku Asia kupurina, ba mekabage kamonai ta mana i botu karaku nina wai ko kuiri.

¹⁹A tere kirena meyiku ba ere mata okowiku, Bada ana saibira a wosei ba ruruba kaikapona, Jew biyisi karisi yai a yauni.

²⁰Ko kuiri kata rumamarai ai beyebeyimi, ba kega awaika kesana a botawani. Awaika iti baisim wai debai, ba ami yove yai awonimi.

²¹Matapa awonimi kata, Jew ba Greek biyimi God kurina kona tombaubaunimi, ba Iesu koni geruwei.

²²Ba karaku, Kanuma Kaobaisiyena i kaotuneiku a nenae ku Jerusalem, kega a kuiri awaika ina tupuwa kuriku.

²³A kuiri kata meyaga ereonowasi yai Kanuma Kaobaisiyena, i kaobinonoriku kata patuma yovena ba paiwara e potapotaiku.

²⁴Saba au yawasa kuriku wai kega sawara kaimasawina, saba Bada Iesu ana saibira i tauniku wai ani kakabi, wai kona wata a baibaiyavi. Pipiya kurisi God ana baibaitai, warana gairena ata rumamarei.

²⁵Karaku a kuiri kata komi iyabomi God ana basileiya kurimi a rumamarei, wai kega kona kinana meyiku.

²⁶Kona kairavina karaku a wonewonimi kata kotoi wata ina siwana, wai kega kunumakina ana kabari.

²⁷God ana waina ereonowana a rumamarei kurimi, kega kesana a botawani.

²⁸Ko pota meyimi! Komi ba God ana dam Kanuma Kaobaisiyena i berimi wai, God ana ekaleisiya taranai i gimonisi wai ko pota kabitamnisi.