Acts 20:1-13

¹Vikaruwaḡawaḡa au Ephesus taon i kwa ma au murina Paul kerisiana i raukwatueiai da i vinua-terenei, i viegualauei ma i netawanei da i nae au Masedonia provins.

²Ma dobuna ḡaeḡaenana i naeni ma kaua maḡamaḡaui kerisiana i vinua-terenei. Anina ma au Akaia i ḡeta.

³Kampa nawaravi tonuḡa i mae. Tauna i vokaukaua da ita nae au Syria ma wate i nelaḡai da mai Jew ḡelaui viraḡenana i viviogatarei lamna aubaina da i nae me au Masedonia.

⁴Nelara ḡelaui i votaḡotaḡo taui lamna Piras natuna Sopater ana dobu Berea; Aristakas ma Sekundus, mai Thesalonika, ma Gaius tauna ana dobu Derbi; ma Tijikus ma Trophimus ai dobu Eisia provins; ma Timothy.

⁵Taui wagei i ainae au Troas ma kampa i painiai.

⁶Ma palawa bagibagina torelana au murina, wagei Philipai taon au Masedonia provins a netawanei. Ma aupom 5 au murina au Troas a ḡeta ai rava awari, kampa aupom 7 a mae.

⁷Wiki au karena - Sunday tauai a vitagogielai voepaepa ma Bada ana amgogona aubaina, ma kampa Paul i jima da nubautuva, aubaina maratomna da ita nae.

⁸Numa vatavatara au tepana a vitagogielai, ma kampa rampa maḡamaḡaui i ararata.

⁹Oroto laragana wavana Eutikus au windo i kiakiala ma Paul i raraugugula, ma tauna matana i pota kaua da i raunuavuru, ma kampa au tepa dewadewana i peu-ḡaira da au doa i rauei. Maranai taui i ḡaira da ita voepai, tauna irairaḡena.

¹⁰Paul i ḡaira, i matave-tepani ma i rapai ma rava i riwei i pa, “Eḡa ona vinuabola, tauna lawalawaina!”

¹¹Anina ma Paul i ḡae me au numa ma kerisiana maiteni Bada ana amgogona amna i ani ma awari i babani maratom. Ma Paul nai dobuna i netawanei.

¹²Taui laragana lawalawaina i naiei au numa ma rava orai i rauei.

¹³Paul aenei i nae au Assos ma tauai i riwelai da wagei ana nae au Assos da tauna kampa ana vigerui.