Acts 1:8-21

⁸Ba maranai Kanuma Kaobaisiyena ina botu kurimi wai maragata kona yauni, ba yauku kairaviku pipiya kurisi koni sisiya, Jerusalem kamonai ba Judea ereonowanai ba Samaria ai ba dobu tompipininai.”

⁹Nikona i sisiyei murinai wai si kinakinani ba God i yauna taveyei, i gae ba guba kamonai i siwana.

¹⁰Si gagawa si kita tupeni i gegae ku kaidamona ba yagiyagina wata sebasebare ruwamo gara poepoesi yai si kau bunaga ba parisi yai si bimsiri.

¹¹Ba si wona, “Galilee sebasebare, awaika kairavina nina ko bimsiri ba ko gagawa ku sapama? Niko Iesu, gwabimi yai God i yauna taveyei i gae ku sapama wai ketana kesaninai yebo kona kinani ina veramaga.”

¹²Damanina ba apostle Olive koyanai si veramaga ku Jerusalem, kata si yewo wai kana rabarabana kilometre kesana rubana.

¹³Maranai si verakasibau wai, si riu ku yove ba si gae memena si mamana wai ku gawarina. Ba iyabosi wata nai si mamana wai kona, Peter, John, James, Andrew, Philip, Thomas, Bartholomew ba Mathew, Alphaeus natuna sebare James, Simon Zealot biyina ba, James natuna sebare Judas yebo yabata.

¹⁴Kosi ereonowasi mamanina namai si kesanisi ba si rupari, bibaine ba Iesu sinana Mary ba warewaresina yabata.

¹⁵Ba kosi marasi yai bigeruwana biyisi asi 120 rubana kamosi yai ba Peter i bomsiri ba i sisiya,

¹⁶i wona, “Warewaresiku, God wonana wai bisuwona ina tupuwa Kanuma Kaobaisiyena, matapa naki David kawanai Judas kairavina i sisiya, kata i wawana wai Iesu si patumi.

¹⁷Kona wai ata pipiya kesana ba kamoti yai i saibisaibira.”

¹⁸Ba kona ana goyona maisana i yauni wai tano i gimoni, ba namai gayaminai i nao i peku ba siyana i kwata wai kamokamona i tamosewasewa.

¹⁹Ba pipiya ereonowasi Jerusalem kamonai niko sisiya si nonori wai asi gamo ai kupurina si yorei, Akeldama, kona basuna wai tara tanona.

²⁰Damanina Peter i wona, “Nikona Salamo kamonai si kirumi si wona, ‘Kata kona gawarina wai ina kwebu, ba kega kesana kotoi namai ina mana.’ Ba ‘pipiya bauna kana gawara ina yauni ini bada.’

²¹Kona kairavina sebare kesana kamoti yai niko mara veoromina Bada Iesu yabata ta mana ba ta yewo neubuwa wai, kona tana binei kata Judas kana gawara ina yauni,