Acts 19:8-18

⁸Paul alkent irrpetyek-atwety Jew-rnem-then angkerrenh, tawen Ephesus-itwek. Ra arnkatyel renh-rnem ilek, “Jesus Ingkart ingkerrenhek aneyel.”

⁹Jew ingwer-rneman ilkelhey-angenhan Jesus-kenh angkek awelheyek. Irrpelthirrenh ingwer-rnem-itwek. Alakenh Paul Jew-rnem-kety amentirrek. Jesus-kenh kwertengerl-rnem alhek Tyrannus-kenh warl ilkwewarl. Arlta arrpanenhel ra akngerr ingwer-rnem akaltyiletyek.

¹⁰Ra alakenh aherrety atherrel akalty-anthenh. Kel Asia-areny ingkerrenhel-anem Akngey-kenh angka awek, Jew-el-rnem-then apmer Greece-arenyel-rnem-then.

¹¹Akngeyel-anem Paul renh rlterrkilek, ilek-ilek mpwaretyek.

¹²Arntetyel Paul-kenh arnkwa arnep-arnenty, ra kel mwerrirremarl. Artwa ra apek arrenty-akertarl aneyel, itnweng ikwer-they ywerremarl.

¹³Jew irrpety apmer ingwer-rnem-warl alhenh, arrenty-akert-rnem mwerril-ayntetyek. Jew-rnem arrkernelhek arrenty-akert-rnem mwerriletyek Jesus-kenh itna itnewemel. Rernem itnweng apmwernem alakenh ilek, Jesus ikwerenh itnangkwarr. Paul-el ingwer-rnem akalty-anthek angka Jesus-akert. “Itna ikwerenhel-antey atha arrenhantherr ilem tyerrelhetyek.”

¹⁴Jew-rnem-kenh atyetyart tyaty-areny anyent anenh, itnan ikwerenh Sceva. Artwa 7 alerikw ikwerenh-rnem. Artwa 7-pel renh-rnem irrkaty-angkwarr arrkernelhek, Jesus-kenh itnel itnweng apmwernem irrentetyek rlterrk ikwerenh-akertel.

¹⁵Arrenty-akert angkenh, “Athan Jesus-then Paul-then iterl-areyelarl. Angwenharl arrantherr?”

¹⁶Ikwer-penhan arrenty-akert-rnemel artwa 7-pel renh-rnem atwek. Artwa 7-pel warl-they tyerrelhemel aterel anterrek, arrkngwentemel anterrek, arnkweweny.

¹⁷Ephesus-areny-rnemel awek-penh Jew-rnem-then Greece-areny-rnem-then rernem-anem aterirrek ikwer-rnem-kety. Rernem Ingkart Jesus renh tnakek.

¹⁸Ikwer-penhan Jesus-arl apenteyel ingwer-rnem ilelhek rernemarl apmwangkwarr apentenh.