Acts 19:28-41

²⁸Awekarl-penhan artwa ingwer-rnem ahelirrek. Rernem arlkek, “Artemis Ephesus-areny-rnem-kenh Akngey innga aneyenh.”

²⁹Ingkerrenh-anem tawen ikwerel-anem ilterrek. Gaius Aristarchus-atherr anterrkwek aketh-itwek anyentilek. Gaius-atherr Macedonia-areny-atherr Paul-angkwarr ilkwatherr alhek apmer-they.

³⁰Paul-anem ilkelhek ikwer-rnem-warl alhetyek ikwer-rnem-warl angketyek. Kwertengerl-rnem ikwer arrkngert angkek,

³¹Apmer-areny artwamp irrpety Paul-kenh-anem anenh. Rernem ikwer-warl angka thwenek ikwer arrkngert angketyek, akngerr-kety, atwekerr.

³²Ephesus-areny-rnem akarrirrek, angkerretyek. Rernem-anem apatemel arlkek.

³³Jew-rnemel Alexander arrwekel-warl rnkernek, arrwekel-ampeny-itwek rtnetyek akngerr-itwek. Ingwer-rnem aleth-antey arlkenh, “Artemis Ephesus-areny-kenh altyerr inngan.” Alexander ikwer-rnem angkek akaterirretyek, ra ikwer-rnem-warl angketyek.

³⁴Ingwer-rnemel renh alhengk-arek ra Jew anenharl. Rernem aleth-antey ikwer arlkenh, “Artemis Ephesus-areny-kenh altyerr!”

³⁵Ikwer-penhan tawen-areny atyetyartel-anem akngerr akatelhilek, “Artwa Ephesus-areny-rnemay! Anantherr ingkerrenh akalty Artemis-kenh tyaty arraty arntarnt-areyel. Anantherr apwert aknganenty ikwerenh alker-theyarl aytnek arraty arntarnt-aretyek. Paul arlkarirrek, rernem altyerr anyent ikwerenh apentetyek, rernemarl arnwarnek.

³⁶Nhenh innga aneyel, arrantherr arternp awelhetyek, arrkngert angkey-angenh.

³⁷Arrantherr artwa yanh-rnem apalel anterrkwemel atnwenhey-alhek nhenh-warl. Rernem arrangkwarl, Rernem arlarl ampwal ilenhek, Artemis ikwer irrpelthirrey-angenharl. Rernem man anyelkel iney-angenh tyaty ilenh-rnem-they.

³⁸Demetrius thilp mpwarey-angker artwa rernem renh-rnem ayntarrp-iletyek. Artwa court-areny kel aneyel, rernem ikwer ilelhetyek. Rernem renh-rnem court-warl atnwenhey-alhemer, court-itwek ayntarrp-ilemel iletyek.

³⁹Angka ingwer arrantherr iterl-areyel kel arrantherr arratyilerretyek.

⁴⁰Roman kapmentel ikwer-penh aweyenh anwantherr angkewarl irreyenh anwantherr apalel arlkek-penh.”

⁴¹Alakenh angkek-penh ra renh-rnem ilek, “Kel arrantherr arlperrtyirremel alpenherr-arey!”