Acts 19:28-40

²⁸Kona si nonori wai si yagisi, ba si dagui si paraparara, “Ephesus asi god wasike Artemis maragata sakina, Ephesus kamonai!”

²⁹Kega rabarabana meyaga tupana kamonai bubuwa i rakata saki. Macedonia biyisi Gaius ba Aristarchus, Paul turaturana si taina kwarokwaroisi, ba yabata si vera si riu ku aba gayogayo gawarina.

³⁰Paul ana waina ita riu ku koroto kamona saba bigeruwana biyisi kega si kaotaveyei.

³¹Kupura babadisi, Paul turaturana mutusi, yebo wara si porai kurina si wone sakiyei kata kega ku meyaga aba gayogayo gawarina ita riu.

³²Kamonai pipiya ereonowana si bubuwa wai, si paraparara kwatakwatama, mutusi sisiya kesana ba mutusi sisiya bauna. Ereonowasi si bubuwa kairavina, pesarisi kega si kuiri awaika kairavina si notuwa.

³³Jew biyisi koroto kamonai, Alexander si rubukoini ku naona, ba si wonei kata ita wone kabitamnisi. Yaronai i tapi tawanisi wai si ma guguba, basuna ana waina kairavisi iti sisiya.

³⁴Ba maranai koroto si bopanai kata kona Jew biyina wai para si dagui, “Ephesus asi god, Artemis maragata sakiyina Ephesus kamonai! Ephesus asi god, Artemis maragata sakina Ephesus kamonai!” Ba si para tupetupena yepo ora ruwamo rubana.

³⁵Meyaga badana kaikapona i wonisi si ma guguba ba i wona, “Ephesus biyimi, pipiya dobu ereonowanai si kuiri, kata Ephesus kona Artemis ana eteni temple kana aba potapota, ba gubagubana wai sapamai i peku kurita.

³⁶Nikona kega kotoi ini buruburuwei, kota ma guguba ba kega kona reso kwatakwatama.

³⁷Nikosi sebasebare ko urabaisi ko botu nikei, wai kega awaika Artemis ana yove taparoro kaikapona kamonai si pisikari kona kega ata god wasikena si gigimi.

³⁸Abisiri yai Demetrius ana sabisabirisi yabata te bikunumakisi wai, bibuibuiya biyisi te mamana kosi ko kinanisi kata ini bibuibuiya kabitamnisi.

³⁹Awaika mutusi yebo karavisi ko bikunumakisi wai Rome bibuibuiya biyisi kosi sina bobitotorisi.

⁴⁰Rome biyisi niko binuwamotom kairavina sini kunumakita, ba bibuibuiyita kairavina wai mekabage tana wona?”